Douglas Warren Diamond

Douglas Warren Diamond (* 25. Oktober 1953) is en US-amerikaansch Ökonom. He is Merton H. Miller Distinguished Service Professor of Finance an de University of Chicago. Sien Verkloren vun de Existenz vun Banken is en Standardwark vun sien Fach. 2022 wurr hüm gemeensam mit Ben Shalom Bernanke un Philip Hallen Dybvig de Nobelpries för Weertschapswetenschapen tospraken.

Leven

Diamond hett Volkswertschapslehre an de Brown University (A.B. 1975) in Providence, Rhode Island un de Yale University (M.A. 1976 un M. Phil. 1977) in New Haven, Connecticut studeert. Dornah wurr he Lehrbeupdragter. 1980 hett he sien Doktertitel Ph.D. kregen. Diamond keem 1979 as Instructor an de Booth School of Business vun de University of Chicago. He wurr Assistent (1980 bit 1983) un Associate Professor (1983 bit 1986). 1987/88 weer he Perfesser för Finance an de Yale School of Organization and Management. In’n Ansluss weer he Perfesser för Finance un vun 1993 bit 2000 Theodore O. Yntema Professor of Finance in Chicago. 1997 weer he Gastperfesser för Finance an de Hong Kong University of Science and Technology. He weer ok Gastdozent an de Universität Bonn (1993) un bi de Bank of Japan (1999). Siet dat Johr 2000 is he Merton H. Miller Distinguished Service Professor of Finance un siet 2010 Co-Direkter vun dat Fama-Miller Center for Research in Finance. 1999 wurr he todem wetenschaplich Mitarbeiter an dat National Bureau of Economic Research. He hett tallriek Ph.D. Studenten betrüet, ünner annern Efraim Benmelech, Catherine M. Schrand un Kevin Francis Rock.

2001/02 weer he Präsident vun de Western Finance Association (2006 weer he Distinguished Speaker) un 2003 vun de American Finance Association (tovör all in den Board of Directors). Vun 1988 bit 2001 weer he Herutgever vun dat Journal of Business. Vun 1988 bit 1996 bzw. vun 2000 bit 2003 weer he Mitherutgever vun dat Journal of Finance un vun 1995 bit 2001 vun dat Journal of Banking and Finance. Ferner hörr he vun 1989 bit 1993 den Editorial Board vun dat Journal of Financial Intermediation an un weer vun 1993 bit 1997 Utlandsredakteur vun de Review of Economic Studies. 2005 hett he de Princeton Lectures in Finance an dat Bendheim Center for Finance präsenteert. 1990 un 2008 weer he wetenschaplich Berader vun dat Federal Reserve Board. Wiedere Plichten harr he in de Boards in Richmond, New York un Chicago. To Tiet is he Mitherutgever vun dat Journal of Financial Services Research (siet 1993) un Liddmaat in dat Board of Directors vun dat Center for Research in Security Prices.

To sien Swoorpunkten hörrn uünner annern Finanzintermediäre, de Finanzkrise, Liquidität, Bankenregulierung, Inlagenversekerung un Finanzschulden. He wurr mit Stipendien dör ünner annern vun de National Science Foundation un da Garn Institute of Finance fördert. Mit Philip Hallen Dybvig hett he dat Diamond–Dybvig-Modell för dat Beschrieven vun Liquiditätsengpässen vun Banken entwickelt.

Diamond is siet 1982 mit Elizabeth Cammack Diamond verheiraadt un hett twee Kinner.

Utteknungen

• 2011: Thomson Reuters Citation Laureates
• 2012: Morgan Stanley-American Finance Association Award for Excellence in Finance (doteert mit 200.000 US-Dollar)
• 2013: Ehrendokterwürde vun de Wertschapswetenschapliche Fakultät vun de Universität Zürich

Liddmaatschapen

• 1975: Liddmaat vun de akademische Ehresellschopp Phi Beta Kappa vun de Brown University
• 1990: Fellow vun de Econometric Society
• 2001: Fellow vun de American Academy of Arts and Sciences
• 2004: Fellow vun de American Finance Association
• 2010: Fellow vun de Financial Management Association
• 2017: Liddmaat vun de National Academy of Sciences

Publikatschonen (Utwahl)

• mit Philip Hallen Dybvig: Bank Runs, Deposit Insurance, and Liquidity, in: Journal of Political Economy, 1983, Vol. 91, No. 3, S. 401–419.
• Financial Intermediation and Delegated Monitoring, in: Review of Economic Studies, 1984, Vol. 51, No. 3, S. 393–414.
• Monitoring and Reputation: The Choice Between Bank Loans and Directly Placed Debt, in: Journal of Political Economy, 1991, Vol. 99, No. 4, S. 689–721.
• mit Raghuram Rajan: Liquidity Risk, Liquidity Creation and Financial Fragility: A Theory of Banking, in: Journal of Political Economy, 2001, Vol. 109, No. 2, S. 287–327.
• Banks and liquidity creation: a simple exposition of the Diamond-Dybvig model, Fed. Res. Bank Richmond Econ. Q., Band 93, 2007, S. 189–200. pdf, web archive
• mit Ranghuram Rajan: Fear of fire sales, illiquidity seeking, and credit freezes, in: Quarterly Journal of Economics, 2011, Vol. 126, No. 2, S. 557–591.

Weblinks

• Douglas W. Diamond in de Datenbank Research Papers in Economics
• Douglas Warren Diamond an de Booth School of Business vun de University of Chicago
• Webseite vun Douglas Warren Diamond