Hephaistos (Mythologie)
Hephaistos (greeksch Ἥφαιστος, latiensch Hephaestus, up Düütsch ok Hephäst) is in de greeksche Mythologie de Gott vun dat Füür un vun de Smeed. In de Röömsche Mythologie heet he Vulcanus. He höört to de twolf Olympiers to.
Geschichten
[ännern | Bornkood ännern]Hephaistos is de Söhn vun den böversten Gott Zeus un sien Wief Hera (oder ok as en Jungfro vun Hera alleen boren). Vunwegen dat he lüttsch un aasig antosehn weer un luut schreen dö, smeet sien Mudder em vun’n Olymp hendal, as he just boren weer. He füll bi de Insel Lemnos in den Ozean. Vun dor af an weer he lamm. De Nymphen Thetis un Eurynome hefft em rett’ un pleegt un uptagen. Bi jem hett he de Kunst vun dat Smeden kennen lehrt. Smuck hett he ok för jem anfardigt. Vunwegen dat de Insel Lemnos vulkaansch weer, güng sien Kult vun dor af ut. De Römers meenen, sien Warksteed weer woll ünner den Ätna. As he groot weer, smeed he en Gullen Thron un stüür em nah den Olymp. Dor woll he Hera mit torüchbetahlen, wat se em andaan harr. As se sik dor up setten dö, keem se dor nich mehr vun weg un bloß man Hephaistos schaff dat, ehr free to maken. Eerst as de annern Gödder dor duchtig um bidden döen, kehr he torüch na’n Olymp un leet ehr free.
En anner Vertellen is, dat Hephaistos bi en Striet twuschen Hera un Zeus de Mudder helpen wull, man Zeus greep em bi’n Enkel un smeet em vun’n Olymp hendal. He füll bi Lemnos in de See. Dor funnen em de Sintoi, en Volksstamm vun de Thrakers, de dorhen utwannert weern. De plegen em gesund. Man he bleev en Hinkebeen.
Zeus woll dat denn wedder goot maken un dach, he woll em de Aphrodite to’e Fro geven. Man de weer nich besunners tro. Se hett wat mit Ares harrt. Hephaistos hett dat aber spitz kregen un hett en Nett maakt, wo he de beiden in fungen hett, as se just togangen weern. Dor hett he denn de annern Gödder hento ropen un woll jem dat wiesen, man de fungen an un mössen luuthals lachen. Vunwegen dat de Schriever Homer dat vertellt, warrt düt Lachen „Homer sien Lachen“ nömmt.
Sien Warksteden schöllt ünner den Vulkanon ween hebben. Dor weern de Kyklopen sien Gesellen. Ok Bia un Kratos hefft em hulpen. As Athene ut den Zeus sien Kopp boren is, dor hett he mit sien „Slag vun Hephaistos“ dor bi hulpen. To’n Dank woll Zeus em Athena as Bruut schenken, man just, as Hephaistos mit ehr tosamen kamen wull, büx Athena ut un sien Saam full up’e Eer. Dor is denn Erichtonios, de Atheners ehr Held vun wurrn. Sien Mudder weer Gaia, de „Mudder Eer“. Ok mit de Aglaia, en vun de dree Chariten schall Hephaistos en Kind harrt hebben. Dor to warrt ok vun den Bildhauer Ardalos seggt, dat Hephaistos sien Vadder weer.
Ovid meent in sien „Metamorphosen“, dat ok de Röber Periphetes sien Söhn weer.
Wat he smeed hett
[ännern | Bornkood ännern]In sien Smeed ünner de Eer hett Hephaistos siene beröhmten Warken smeedt:
- Twee Deerns ut Gold, de sik rögen konnen (de eersten Roboters)
- De Poorten vun den Palast un de iesern Hallen up den Olymp (de Anfang vun den Stahlbo)
- De Thron för Hera, wo se nich vun los keem
- Den iesern Staff un de Dunnerkielen vun Zeus
- Den Helios sien Wagen
- Athena ehr Aigis
- Den Aietes sien Bullen, de Füür speen döen
- De Gestalt vun Pandora (as den Epimetheus sien Wiev)
- De Artemis ehren Bagen
- Den Eros un den Apollon sien Pielen
- Dat Nett för sien untro Wief Aphrodite
- De Keed, wo Prometheus mit an den Kaukasus anbunnen weer (bi Aischylos)
- Den Ares sien Rüstung
- Den Achilleus sien Wapen un Schild
- Den Aineas sien Schild
Kunst
[ännern | Bornkood ännern]In de Maleree warrt Hepahistos as Smitt geern afbillt. Bekannt sünd de Biller vun Tintoretto, Bassano, Rubens, Tiepolo, Velázquez un van Dyck.