Zoo an de See

De Zoo an de See in Bremerhoben is en Themenzoo, de sik besünners mit Deerten ut’n Noorden un vun de See befaten deit. He liggt direktemang an’n Diek vun de Werser un is kenen Hektar groot. In de Neeg liggt de Grote Lüchttoorn an’n olen Ne’en Haven.

Historie

Vörlöper vun den Zoo is dat Noordseeaquarium. Studienraat Heinrich Lübben harr de Idee un 1912/13 harrn se söven Aquarien in’n Keller vun de Strandhall an’n Werserdiek opboot. Baven in de Strandhall geev dat de Deerten to eten, de ünnen lebennig to sehn weren. 1960 hebbt se ne’e Rüüm anboot un kunnen nu achteihn Becken ünnerbringen. 1976 hebbt se nochmal fief Aquarien un veer Terrarien dorto kregen. Tolets weren dat denn 37 Becken.

An’n 24. Juni 1924 hebbt de „Tiergrotten“ apen maakt. Ok dat weer ene Idee vun Heinrich Lübben. 3500 Quadratmeter weer de Anlaag toeerst groot. Se leeg butendieks noorden de Strandhall. 1934 hebbt se dat Minschenapenhuus opmaakt, later dat Vagelwarmhuus un 1968 dat Kattenhuus. In de 1970er Johren folg dat Nachthuus.

In de 1980er Johren hebbt se denn de Aquarien un de Tiergrotten tosamenleggt.

In’t Johr 2000 hebbt se den Zoo dichtmaakt. Se wullen sik nu en nee Konzept överleggen. An’n 27. März 2004 hett de Anlaag denn wedder richtig opmaakt. De ne’e Zoo wiest de Deerten in ene Ümgebung, de jemehr Levensrüüm naempfunnen is. Wiest warrt vörnehmlich Deerten ut un vun de See. 490.000 Lüüd hebbt denn in’t Johr 2004 den Zoo besöökt.

De Zoo hett grote Gehege mit Waterbeckens. De Deerten leevt nich achter Trallen, mehrstendeels hebbt de Gehege grote Glasschieven, dör de de Besökers dat Veehtüüch ankieken köönt.

De Zoo hett üm un bi 200 Deerten vun 30 Oorden. Dorto höört Iesboren, Basstölpel, Robben un Humboldtpinguine, de vun’t Utstarven bedroht sünd. Disse Vagels will de Zoo ok natüchten. Fröher geev dat mehr as 150 Oorden, doch na dat ne’e Konzept wull de Zoo sik op weniger Oorden kunzentreren un för de denn schöne Gehege inrichten.

Dat Wapendeert is de Iesboor. Op’n Zooladen steiht de Skulptur vun de Iesborendame „Suse 1“. Mit ehr füng 1935 de Tucht vun Iesboren in’n Zoo an.