Kragebein

Skulderbogen med skulderbladet, kragebeinet og brystbeinet. Ribbeina er festa til brystbeinet, og festa til skulderbladet er òg overarmsbeinet.

Kragebeinet (latin: clavicula – «nøkkelbein») ein ein S-forma knokkel i det menneskelege skjelettet. Det går frå brystbeinshandtaket, manubrium sterni, og lateralt og noko oppover rett mot skulderhøgda, acromion. Kragebeinet er den ventrale knokkelen i skuldra, og saman med skulderbladet og brystbeinet så dannar det skulderbogen, cingulum extremitas superioris.

Kragebeinet er det einaste av røyrknoklane som viser ei annan form for forbeining. Medan nesten alle røyrknoklane blir til bein frå ein bruskmodell som igjen vart danna av bindevevsmesenkym, såkalla endokondral forbeining, så blir kragebeinet delvis òg gjort om til bein beint fram utan å vere innom bruskstadiet, såkalla intramembranøs forbeining. Den laterale og mediale delen av knokkelen blir rett nok danna av endokondral forbeining, men den midtre delen blir danna via intramembranøs forbeining.

Beinet ligg rett under huda, og derfor kan ein lett sjå det hos personar med lite underhudsfeitt. Namnet clavicula som på latin tyder «veslenøkkelen», kjem av at knokkelen roterer kring aksen sin når ein abduserer om lag som ein vanleg nøkkel.

• 
  Høgre kragebein sett nedanfrå
• 
  Høgre kragebein sett ovanfrå
• 
  Venstre kragebein sett ovanfrå
• 
  Venstre kragebein sett nedanfrå

Sjå òg

• Skulderblad
• Skulderhøgda
• Brystbein
• Skulderbogen

Bakgrunnsstoff

Wikimedia Commons har multimedia som gjeld: Kragebein

• Kragebein i Store medisinske leksikon