Monede Euro dla Finlandia

	Vos an lenga piemontèisa
	Për amprende a dovré 'l sistema dle parlà locaj ch'a varda sì.

Le monede Euro dla Finlandia a mostro tre dissègn diferent. Ij taj ch'a van da 1 centésim a 50 centésim a mostro un lion, un dij sìmboj aràldich ëd la nassion, dissegnà da Heikki Häiväoja. Ël taj da 1 euro, ëd Pertti Mäkinen, a rapresenta na cobia ëd cign ch'a vòlo. La moneda da 2 euro, ëd Raimo Heino, a mostra la fior e la còcola dël Rubus chamaemorus, l'àmpola àrtica.

Tuti ij taj a inserisso ëdcò le dódes stèile sìmbol ëd l'Euròpa e l'ann dël cònio.

Ij finlandèis, parèj che j'olandèis, a l'han soasì ëd dovré nen le monedin-e da 1 e 2 centésim. Le monede an sircolassion a resto legaj ma a sono pì nen distribuìe. Ij totaj a ven-o ariondà aj 5 centésim pì davzin. L'ariondament a l'è fait mach për ël total final e ij sìngoj pressi a peulo ëdcò avèj dle cifre diferente da 0 e 5.

2 euro - Ël Rubus chamaemorus
1 euro - Na cobia ëd cign

Monede comemorative da 2 euro

La Finlandia a l'ha emëttù quat monede comemorative da 2 euro ant j'agn 2004, 2005, 2006 e 2007. La moneda dël 2004 a sélebra l'ampliament ëd l'Union Europenga aj 10 neuv Stat intrà ant ël 2004. A mostra na colòna d'andova ch'a seurto des but ëd feuje, sìmbol dël chërse dl'Union. La moneda dël 2005 a rapresenta na colomba dla pas e a sélebra ij 60 agn ëd le Nassion Unìe e ij 50 agn ëd l'intrada dla Finlandia ant l'ONU. La moneda dël 2006 a comémora ij 100 agn dl'arforma dël Parlament Finlandèis e dël sufragi universal e a arpresenta doi visagi, un mascolin e un feminin. La moneda dël 2007 a sélebra ij 90 agn ëd l'andipendensa dla Finlandia e a mostra na nav a rem guidà da 9 timonié.

Sempe dël 2007 la Finlandia, tanme tuti j'àutri Stat ëd l'Union, a l'ha emëttù la moneda comemorativa për ij 50 agn ëd la signadura dij Tratà ëd Roma, ch'a l'han sancì la nàssita dla futura Comunità Europenga.