Gianni Rivera

	Vos an lenga piemontèisa
	Për amprende a dovré 'l sistema dle parlà locaj ch'a varda sì.

Giovanni (Gianni) Rivera (Lissandria, 18 agost dël 1943), a l'é stàit un dij mèj fotbaleur piemontèis ëd la stòria antramentre che al di d'ancheuj a l'é polìtich al parlament europengh.

A l'ha giugà ant ël ròl ëd mes ala/regista e sò stranòm a l'era "Golden boy", Matòt d'òr dël fótbal italian.
A l'é stàit ël prim e l'ùnich giugador piemontèis premià con ël balon d'òr (1969), trofeo anventà da l'arvista fransèisa France Football e dàit minca ann al mèj giugador europengh ëd la stagion che a sia ant na squadra dl'UEFA. Cost premi a ven assignà për mojen dij vot che ij giornalista sportiv europengh a dan a na lista dij giugador europengh pì fòrt.

Sò gieugh a l'era rafinà e tàtich e për sòn a l'é stàit motobin criticà dai tradissionalista che a preferivo 'l gieugh dur, coma për esempi 'l giornalista Gianni Brera che a l'arprociava përchè a Rivera a-j piasìa pa sacrifichesse për soa squadra.

Rivera giugador

A l'é stàit Franco Pedroni, ex difensor dël Milan e antreneur dël Lissandria, a deje na possibilità e a felo giughé për la prima vira an Serie A dël 1959, a nomach quìndes ani, con la maja grisa ant la partija Lissandria-Inter (finìa 1 a 1).

Con ël Milan, anté che a l'ha giugà dal 1960 për 19 stagion, a l'ha giugà 658 partìe an marcand 164 grije, ëdcò sensa esse n'atacant ma mach un regista, e an vagnand dël 1973 la classificassion dij marcador ansema a Paolo Pulici e Giuseppe Savoldi, con 17 grije.

Con ij ross-e-nèir a l'ha vagnà tre scudèt (1962, 1968, 1979), quatr Cope Italia (1967, 1972, 1973 e 1977), doe Cope dij Campion (1963 e 1969), na Copa Antërcontinental (1969) e doe Cope dle Cope (1968 e 1973).

A l'é stàit capitani dël Milan për dódes ëstagion; dël 1968 a l'ha fondà con d'àutri giugador l'Associassion Italian-a Fotbaleur (an italian Associazione Italiana Calciatori), nàita për volontà dl'avocà Sergio Campana.

Artirasse dal fótbal giugà dòp che 'l Milan a l'ha vagnà sò scudèt ch'a fa des (dël 1979, tìtol che a l'ha mnà 'l Milan a soa prima stèila) a l'é peui stàit vice-pressident fin-a al 1986, quand la società a l'é stàita catà da Silvio Berlusconi.

Selession italian-a

Con la selession italian-a a l'ha giugà quatr vire 'l campionà dël mond (1962, 1966, 1970 e 1974) e a l'é stàit campion europengh dël 1968. A l'ha giugà 60 partìe an marcand 14 grije.

Cariera polìtica

Intrà an polìtica dël 1994, dal 2005 a l'é deputà ant ël parlament europengh andoa a l'é andàit al pòst ëd Mercedes Bresso, dventà presidenta dla Region Piemont.

Palmarès

Campionà italian: 3

Milan: 1961/1962, 1967/1968, 1978/1979

Copa Italia: 4

Milan: 1966/1967, 1971/1972, 1972/1973, 1976/1977

Copa Antërcontinental: 1

Milan: 1969

Copa dij Campion: 2

Milan: 1962/1963, 1968/1969

Copa delle Cope: 2

Milan: 1967/1968, 1972/1973

Con la selession italian-a: 1 Campionà d'Europa (1968)

Individual

Balon d'òr: 1 (1969)
Cap-canonié dla Serie A italian-a: 1 (1972/1973)