Aftenposten

Aftenposten byrja med nettutgåve (Aftenposten.no) i 1995. Ordninga med såkalla betalingsmur for å gje ikkje-abonnentar tilgang til å lese avisa vart innført i 2013. Medan betalande abonnentar på papir og nett var totalt 248 595 i andre halvår 2023, var talet på daglege lesarar i gjennomsnitt 524 501, ifylgje statistikk frå Mediebedriftenes Landsforening.

Aftenposten produserer fleire podkastar, der Aftenpodden og Forklart er mellom dei mest populære.

Avisa vart grunnlagd i 1860 av boktrykkjar Christian Schibsted under namnet Christiania Adresseblad. Noverande namn vart teke i bruk i 1861. Aftenposten, og seinare Schibsted-konsernet, var fram til 1980-åra ei personleg eigd bedrift med Schibsted-familien og etterkommarar i denne som dominerande eigarar. I 1983 vart konsernet omgjort til aksjeselskap.

Aftenposten var til å byrje med eit upolitisk nyheits- og annonseblad, men fekk frå slutten av 1880 eit konservativt preg. I den lange perioden fram til rundt 1990, som vart avslutta med avgangen til sjefredaktør Egil Sundar, var Aftenposten ei såkalla høgreavis som også arbeidde for at Noreg skulle få borgarlege regjeringar. I åra etter har avisa redaksjonelt hatt en profil som best kan karakteriserast som politisk uavhengig, men liberal-konservativ.

Avisa fekk det store oppsvinget sitt under redaktør Amandus Theodor Schibsted (1879–1913). Han var ein framifrå journalist med sans for aktuell nyheitsreportasje. I dette tidsrommet vart avisa eit leiande annonseorgan, noko som skapte ein solid økonomisk basis. Aftenpostens vekst heldt fram i mellomkrigsåra og etter andre verdskrigen. Grunnlaget for veksten i åra etter 1945 vart til ei viss grad lagt ved at Aftenposten kom ut under heile okkupasjonstida.

Som alle andre avisar som kom ut i Noreg under andre verdskrigen måtte òg Aftenposten underkaste seg streng sensur og rette seg etter direktiv frå den tyske okkupasjonsmakta. Men allereie i 1930-åra, etter at nazistane greip makta i Tyskland, viste Aftenpostens redaksjonelle leiing stor sympati med dette regimet og den ideologien det forfekta.

I 1966 overtok Aftenpostens eigarar dagsavisa Verdens Gang (VG). Dette innebar i fyrste rekkje eit trykkteknisk samarbeid. I 1976 gjekk Aftenposten og Verdens Gang over til offsettrykk. Samtidig med overgangen til fotosats tok avisene i bruk laserteknikk ved heilsides radiolinkoverføring frå setjeriet i Akersgata til trykkjeriet på Linderud. I 1999 tok avisa i bruk det noverande trykkjeriet sitt i Nydalen. I 2003 flytta avisa frå den tradisjonsrike plasseringa si i Akersgata, der ho hadde halde til i 127 år, til åtte etasjar i det ombygde Postgirobygget ved Oslo Sentralstasjon. I 2014 flytta dei tilbake til Akersgata.

Avisa kom inntil desember 2012 ut i to utgåver: ei morgonutgåve, som kom alle dagar i veka, og ei kveldsutgåve, Aften, som vart distribuert i Oslo-området med hovudvekt på lokalt stoff. Kveldsutgåva vart avvikla i 2012. Kveldsnummeret kom i tabloidformat frå 1997. I 2003 kom éin av seksjonane i morgonutgåva i tabloidformat, medan heile morgonutgåva fylgde i 2005. Frå 1990 har Aftenposten òg hatt sundagsutgåve. Aftenposten gav ut landsutgåva Ukens Nytt tre gonger kvar veke i perioden 1890–1989. Vekesbilaget A-magasinet har blitt gjeve ut i 1926–1943, 1963–1993 og sidan 2005.

Til og med 2015 gjeld opplagstala berre papirutgåva. Frå 2020 blir det brukt netto opplagstal for digitalt abonnement og papirabonnement i andre halvår, ifylgje Mediebedriftenes Landsforening.

• Schibsted ASA
• norsk presses historie
• media i Noreg

• Aftenposten sine nettsider

• Wasberg, Gunnar Christie: Aftenposten i hundre år, 1960