Eidsbugarden

Eidsbugarden er ein turiststad i Vang kommune i Innlandet fylke, ved vestenden av innsjøen Bygdin, i den sørlege delen av Jotunheimen. Staden har blant anna hotell, turisthytte (DNT-hytta Fondsbu) og hytteområde.

Det går veg inn til Eidsbugarden frå Tyinkrysset på E16. Over Bygdin går det rutebåt til fylkesveg 51 i Øystre Slidre. Frå Eidsbugarden går mange varda turistruter innover i Jotunheimen.

Ved Eidsbugarden står Ståle Kyllingstads bautastein over diktaren A. O. Vinje, som skapte omgrepet Jotunheimen. Vinjestova ved Eidsbugarden vart reist av diktaren og venene hans i 1868. Ho inngår nå i eit lite høgfjellsmuseum. Kvart år i juli blir musikkfestivalen Vinjerock arrangert på Eidsbugarden.

Namnet er samansett av eid (Eidet mellom Bygdin og Tyin) og bu og gard; brukt av Vinje på eit «Pantebrev» i 1868.