Málaga-lughawe

Málaga-lughawe,, sedert Junie 2011 amptelik Malaga–Costa del Sol-lughawe, (Spaans: Aeropuerto de Málaga-Costa del Sol) is die vierde besigste lughawe in Spanje naas Madrid–Barajas, Barcelona en Palma de Mallorca. Dit is betekenisvol vir Spaanse toerisme as die belangrikste internasionale lughawe wat die Costa del Sol bedien. Dit is 8 km suidwes van Málaga en 5 km noord van Torremolinos. Die lughawe het vlugverbindings na meer as 60 lande wêreldwyd, en het meer as 14,4 miljoen passasiers in 2015 bedien, en in 2017 het meer as 18,6 miljoen passasiers deur die Málaga-lughawe beweeg.

Die lughawe beskik oor drie terminale (Tans word net twee bedryf). Die derde terminaal langs die vorige twee het op 15 Maart 2010 geopen, en 'n tweede aanloopbaan is op 26 Junie 2012 geopen.

Málaga-lughawe is die besigste internasionale lughawe van Andalusië, wat verantwoordelik is vir 85% van die outonome gemeenskap se nie-binnelandse verkeer. Dit bied 'n wye verskeidenheid internasionale bestemmings. Die lughawe, wat gekoppel is aan die Costa del Sol, het daaglikse verbindings met twintig stede in Spanje en meer as honderd stede in Europa. Direkte vlugte vlieg na Afrika, die Midde-Ooste en ook na Noord-Amerika in die somerseisoen. Lugrederye met 'n basis by die lughawe is Air Europa, Norwegian, Scandinavian Airlines, Ryanair, Vueling en EasyJet wat 'n seisoenale basis bedryf.

Beheertoring by die Málaga-lughawe, gebou in 2002

Málaga Lughawe

Málaga-lughawe is op 9 Maart 1919 geopen en is een van die oudste Spaanse lughawens wat steeds op sy oorspronklike ligging geleë is. Ná die uitvoer van toetsvlugte, het die eerste geskeduleerde lugdiens op 1 September 1919 vanaf Málaga vertrek, toe Didier Daurat met gereelde vlugte tussen Toulouse, Barcelona, Alicante, Tangier en Casablanca begin het.

Die enkele aanloopbaan is in die 1960's verleng, en 'n nuwe terminaal is in die middel van die terrein opgerig. Gedurende hierdie tydperk van ontwikkeling is nuwe navigasietoerusting geïnstalleer, insluitend 'n radarstelsel in 1970.

Die lughawe het sy huidige titel in 1965 gekry. In 1968 is 'n nuwe passasiersterminaal geopen, en in 1972 'n tweede terminaal om spesifiek vir nie-geskeduleerde verkeer voorsiening te maak. 'n Toename in maatskappye wat pakketvakansies aanbied (ongeveer 30 teen 1965), het bygedra dat hierdie soort verkeer 'n toenemende deel van die lughawe se passasiersbesigheid verskaf het.

Die terminaal is soortgelyk aan dié wat in Palma de Mallorca, Alicante, Ibiza en Girona gebou is.

Terminale

Málaga-lughawe beskik oor drie aangrensende terminale, alhoewel slegs twee tans in gebruik is.

Terminaal 1

Terminaal 1 (T1 genoem) is op 30 Junie 1972 geopen en was vir vlugte na nie-Schengen-bestemmings gebruik, saam met vlugte na Ceuta en Mellila.

Hierdie diens is sedert Maart 2010 na terminaal 2 en terminaal 3 verskuif. Terminaal 1 is nou gesluit vir die publiek.

Terminaal 2

Terminaal 2

Terminaal 2 (T2 genoem) is op 30 November 1991 geopen, en staan bekend as die Pablo Ruiz Picasso-terminaal. Die gebou is ontwerp deur die argitek Ricardo Bofill, en is gebou om in kombinasie met die reeds bestaande passasiersterminaal bedryf te word. Dit het drie verdiepings asook 'n kelder, die tweede verdieping is vir vertrekke en die grondvloer is vir aankomste. Die kelder huisves die toonbanke van motorhuurfirmas. Om die terminaal te voltooi, is 'n gebou opgerig vir parkeerplek en motorhuur, wat reg langs die ingang van die vertrek- en aankomssale gebou is.

Terminaal 3

Pier D het op 15 Maart 2010 geopen

Terminaal 3 (gestileer as T3) is 'n nuwe terminaal by die Málaga-lughawe. Bouplanne het in 2001 begin en bouwerk in 2004. Die konstruksie is deur Ferrovial uitgevoer. Die terminaal is op 15 Maart 2010 deur koning Juan Carlos geopen.

Algemene lugvaartterminaal

Die algemene lugvaartterminaal by die Málaga-lughawe (ook bekend as die private lugvaartterminaal) is langs die N-340-snelweg geleë, naby aanloopbaan 31. Die terminaal is gevorm uit die ou passasiersterminaalgebou, en is sedertdien vernuwe en opgeknap. Dit is op 29 Januarie 1968 geopen en word deur private stralers gebruik.

Vragterminaal

Die vragterminaal is in 1996 geopen, met 16 laaiplekke vir padvervoervoertuie. Dit het 'n oppervlakte van 5 700 vk m en bevat vier koelstoorkamers, 'n kluis vir waardevolle goedere, en 'n area vir gevaarlike en radioaktiewe materiale. Dit is geleë op die noordelike deel van die lughawe, genaamd "Carga Aena" in Spaans.

Statistiek

Passasiersgetalle by Málaga het van 6 miljoen in 1995 tot 13,6 miljoen passasiers toegeneem in 2007, maar in 2009 weer tot 11,6 miljoen gedaal, met die aantal vliegtuigbewegings wat met 13,6% verminder het tot 103 536. Passasiersgetalle het in 2013 tot 12,9 miljoen toegeneem. Vragbedrywighede neem egter elke jaar af.

Jaarlikse verkeer

Jaarlikse verkeer

	Passasiers	Vliegtuigbewegings	Vrag (ton)
2000	9 443 872	92 930	9 920
2001	9 932 975	98 174	9 365
2002	10 429 439	101 519	8 670
2003	11 566 616	110 220	6 837
2004	12 046 277	116 047	6 811
2005	12 669 019	123 959	5 493
2006	13 076 252	127 776	5 399
2007	13 590 803	129 698	5 828
2008	12 813 472	119 821	4 800
2009	11 622 443	103 536	3 400
2010	12 064 616	105 631	3 064
2011	12 823 117	107 397	2 992
2012	12 581 944	102 162	2 711
2013	12 922 403	102 359	2 661
2014	13 748 976	108 261	2 498
2015	14 404 170	108 897	2 472
2016	16 672 776	123 700	2 288
2017	18 628 876	137 092	2 866
2018	19 021 704	141 313	2 768
2019	19 858 656	144 939	3,080
2020	5 161 636	59 668	912
2021	8 874 635	92 248	1 500
2022	18 457 194	144 107	2 193
Bron: Aena Statistiek

Besigste roetes

Besigste internasionale roetes vanaf AGP (2022)

Rang	Bestemming	Passasiers	Verander 2021/22
1	Londen-Gatwick	885 608	506%
2	Dublin	644 495	165%
3	Amsterdam	643 655	49%
4	Kopenhagen	540 749	75%
5	Manchester	534 118	225%
6	Stockholm-Arlanda	473 044	87%
7	Brussel	470 128	50%
8	Parys-Orly	397 094	75%
9	Londen-Luton	381 610	196%
10	Oslo-Gardermoen	364 574	260%
Bron: Estadísticas de tráfico aereo

Besigste Spaanse roetes vanaf AGP (2022)

Rang	Bestemming	Passasiers	Verander 2021/22
1	Barcelona	778 527	50%
2	Madrid	527 212	132%
3	Palma de Mallorca	332 194	76%
4	Bilbao	277 521	48%
5	Melilla	219 240	14%
6	Gran Canaria	200 084	59%
7	Tenerife-Noord	179 598	67%
8	Santiago de Compostela	169 455	62%
9	Ibiza	133 275	32%
10	Asturië	104 830	86%
Bron: Estadísticas de tráfico aereo

Landvervoer

Twee paaie verskaf toegang tot die lughawe - die MA-21 (Torremolinos–Málaga), en 'n toegangspad vanaf die MA20.

Vervoerspilpunt

Vervoerspilpunt

Málaga-lughawe beskik oor 'n groot vervoersentrum buite terminaal 3 met beide aankoms- en vertrekvlakke. Die busstasie en die voorstedelike treinstasie en motorparkeerplek kan vanaf die spilpunt bereik word.

Voorstedelike spoorlyn

Nuwe spoorwegstasie

Die lughawe het 'n ondergrondse spoorwegstasie wat Cercanías Málaga -pendeltreine met Málaga verbind. Die stasie is op 10 September 2010 geopen en is by die aankomsgebied van Terminaal 3 geleë. Treine ry elke 20 minute tussen Málaga City en Fuengirola via Málaga-lughawe.

Busstasie

Daar is 'n ondergrondse busstasie. Daar is ook 'n bushalte buite die vragterminaal.

Motorparkeerplekke

Voordat die nuwe terminaal geopen is, het die lughawe net een groot parkeerterrein gehad, genaamd P2. Die lughawe het nou twee, met 3 700 parkeerplekke. Alle buiteruimtes is bedek. Hulle kan deur die vervoersentrum bereik word.

Eksterne skakels

• Wikimedia Commons het meer media in die kategorie Málaga-lughawe.