Auguste Pidou
Dr Auguste Pidou (* 30. März 1754 z Grancy; † 14. Mai 1821 z Lausanne, reformiert) isch e Schwiizer Politiker gsi.
Läbenslauf
[ändere | Quälltäxt bearbeite]1771 het dr Pidou es Studium in Theologii z Lausanne und 1772 z Gämf absolviert. 1775 isch er ordiniert worde. 1776 het er e Studium in Rächtswüsseschafte z Strossburg gmacht, won er as Huuslehrer em Prinz Charles-Alexandre de Gavre Underricht geh het. Vo 1777 bis 1778 isch er Lehrer am Philanthropinum z Dessau gsi. E Johr spöter z Paris het er sich in de Naturwüsseschafte und Sprooche wiiterbildet. 1780 isch er noch Ängland greist und isch Huuslehrer vo mehrere junge Adlige gsi, won er denn mit ene dur Europa greist isch. 1793 het er sich z Lausanne niidergloo und isch am 24. Januar 1798 Mitgliid vo dr provisorische Versammlig vo dr Waadt worde. Bim Gricht vom Kanton Léman isch er öffentlige Achläger gsi und isch im Dezämber 1800 vom Vollziehigsroot, dr neue konservative Regierig vo dr Helvetische Republik, abgsetzt worde. 1801 isch er Abgordnete in dr helvetische Dagsatzig gsi, 1802 Mitgliid vo dr Notableversammlig und vom Senat und vo 1802 bis 1803 Deputierte an dr Helvetische Consulta. Vom Merz bis April 1803 isch er Mitgliid vo dr Vollziehigskommission gsi, 1803 bis 1814 vom Waadtländer Chliine Root und vo 1814 bis 1821 vom Staatsroot, won er e baar Mol Landamma worden isch.
Am Ändi vo dr Mediation het er em östriichische General Ferdinand vo Bubna z Lausanne dr Root ge, nit dr Plan z understütze, wo vorgseh het ass d Waadt wider under d Herrschaft vo Bärn chiem. 1811, 1812 und 1817 isch er Gsandte an dr eidgenössische Dagsatzig gsi, 1814 Mitgliid vo dr Revisionskommission vo dr Waadtländer Verfassig und vo 1806 bis 1814 Presidänt vom Schuelroot.
Weblingg
[ändere | Quälltäxt bearbeite]- Gilbert Marion: Pidou, Auguste. In: Historisches Lexikon vo dr Schwiiz.
| Dä Artikel basiert uff ere fräie Übersetzig vu dere Version vum Artikel „Auguste_Pidou“ vu de dütsche Wikipedia. E Liste vu de Autore un Versione isch do z finde. |