Kanton Oberland

Charte vo der Helvetische Republik

Dr Kanton Oberland isch vo 1798 bis 1803 e Kanton vo dr Helvetische Republik gsi. Er het s Gebiet vom Bärner Oberland umfasst.

Noch em Iimarsch vo de französische Druppe ane 1798 in d Schwiiz isch die alti Ornig im Kanton Bärn z Änd gange, und im ganze Land isch es zentralistischs Syschtem igfüert worde. Vom Bärner Territorium si d Waadt, s Oberland und dr Unteraargau abdrennt worde. Wil im Oberland gar kei starki separatistischi Strömig existiert het und d Bevölkerig ehnder konservativ iigstellt gsi isch, isch d Begeisterig für e neu Kanton chlii bliibe. 1801 isch in dr Verfassig vo Malmaison vorgseh gsi, ass s Oberland wider zum Kanton Bärn wurd ghöre. Die beide Johr druf si allerdings vom e Duurenander und vo Staatsstreich brägt gsi und d Ordnig vo dr Helvetik isch braktisch ganz zsämmebroche. D Mediationsakte vo 1803 het die definitivi Wiidervereinigung vom Oberland mit em Kanton Bärn brocht.

Dr Regierigshauptsitz vom Kanton Oberland isch z Thun gsi.

Dr Kanton isch in zäh Distrikt iideilt gsi (dr Hauptort isch in Chlammere, wenn er nit gliich wie dr Distriktname isch):

• Saane
• Ober-Simmedaal (Zweisimme)
• Niider-Simmedaal (Erlebach)
• Frutige
• Aeschi
• Thun
• Unterseä
• Interlake (Wilderswil)
• Brienz
• Oberhasli (Meiringe)

Weblingg

• Anne-Marie Dubler: Oberland. In: Historisches Lexikon vo dr Schwiiz.

Dä Artikel basiert uff ere fräie Übersetzig vu dere Version vum Artikel „Kanton_Oberland“ vu de dütsche Wikipedia. E Liste vu de Autore un Versione isch do z finde.