Kanton Léman
Dr Kanton Léman isch e Kanton vo dr Helvetische Republik vo 1798 bis 1803 gsi, wo uf em Gebiet vom hütige Kanton Waadt bestande het. As ehemoligs Underdanegebiet vo Bärn isch s Waadtland noch ere Unabhängigkeit as Lemanischi Republik, wo vier Möned duurt het, as Kanton Léman Deil vo dr Helvetische Republik worde. Dr Kanton Léman het nit numme die früehjeri bärnischi Waadt unfasst sondern au die ehemolige Gmeine Herrschafte Echallens, Orbe und Grandson. D Bezirk Payerne und Avenches hai bis 1803 zum Kanton Freiburg ghört. Dr Kanton Waadt isch 1803 dur d Mediationsakte us em Kanton Léman erschaffe worde.
Dr Kanton Léman het im Früehlig 1798 alle Bärner, wo Güeter im Waadtland gha hai, für churzi Ziit s Verfüegigsrächt über ihr Eigedum entzoge. Für d Usreis in en andere Kanton het me e Pass bruucht, wo me erst übercho het, nochdäm me e Bürgereid uf die helvetischi Ordnig gschwore het. Die Vorschrift het sogar für Senatore und Grossrööt gulte, wenn si zu ihre Versammligen uf Aarau greist si.
D Kantonshauptstadt isch Lausanne gsi. Dört hai dr Prefekt, d Verwaltigschammere und s Tribunal gresidiert. Dr Kanton isch in 17 Verwaltigsbezirk iideilt gsi, wo vo Underprefekte gleitet worde si.
Dr Kanton Léman hätt noch de Blän vom französische General Guillaume Brune us em Johr 1798 zsämme mit vier andere Kantön die Rhodanischi Republik sötte bilde.
| Dä Artikel basiert uff ere fräie Übersetzig vu dere Version vum Artikel „Kanton_Léman“ vu de dütsche Wikipedia. E Liste vu de Autore un Versione isch do z finde. |