Yn Chaisht

Aa-irree Yeesey Chreest liorish Piero della Francesca

She feailley as laa seyr ee yn Chaisht (veih Cásc y Çhenn Yernish) ta kelloorey aa-irree Yeesey Chreest. Rere y Chonaant Noa, daa-irree eh tree laa lurg e chrossey ec Calvary as she mullagh Phaish Chreest t'ayn. T'eh taghyrt jeeragh lurg y Chargys, imbagh daaeed laa er lhiurid jeh trostey, padjeryn as pennys.

She Shiaghtin ny Caisht yn ennym ta currit er y çhiaghtin jerrinagh jeh'n Chargys as t'eh goaill stiagh Tree Laaghyn ny Caisht, goaill stiagh Jerdein Caisht ta kelloorey yn Shibber Jerrinagh as niaghan ny cassyn, as Jeheiney Caisht ta kelloorey Crossey as baase Yeesey.

She feailley yn-astreeaghey ee yn Chaisht. Rere shen, cha nel ee tuittym er y laa cheddin dagh blein. T'ee tuittym er y chied Doonaght lurg y lane-eayst lurg laa lieh yn Arree. Rere earrooaghey ny h-agglishyn, ta laa lieh yn Arree tuittym er 21 Mayrnt (ga dy nee 20 Mayrnt yn laa rollageydagh 'sy chooid smoo jeh ny bleeantyn) as keayrtyn cha nel y lane-eayst tuittym er y laa chiart rere y rollageydys. Rere shen, foddee yn Chaisht tuittym er laa ennagh eddyr 22 Mayrnt as 25 Averil.

Ennym

Ta'n Chaisht goll er enney myr an Cháisc 'sy Yernish as A' Chàisg ayns Gaelg ny h-Albey. Ta'n tree fockle Gaelgagh çheet magh ass Cásc y Çhenn Yernish. Haink y fockle shen gys ny çhengaghyn Gaelgagh veih Pascha yn Ladjyn. Hooar ny Rauee yn fockle ass πάσχα paskha yn Çhenn Ghreagish. By hyndaa ad ny focklyn shen er yn 'eailley Ewagh, Feailley ny h-Eaynchaisht, ny פצחא pəsḥa yn Aramaaish as פסחא pasḥa yn Ewnish. Jiu, she פֶּסַח pesakh yn ennym Ewnish noa-emshyragh ta currit er yn 'eailley Ewagh.