Aðstoðarrektor menntunar og starfsumhverfis

Ragna Benedikta Garðarsdóttir er prófessor í félagssálfræði við Sálfræðideild. Hún lauk BA-prófi í sálfræði frá Háskóla Íslands árið 1995, MS-prófi í félagssálfræði frá London School of Economics and Political Science 1997 og doktorsprófi í sömu grein frá University of Sussex árið 2006.

Ragna starfaði áður við rannsóknir hjá Rannsóknastofnun uppeldis- og menntamála og síðar hjá Félagsvísindastofnun samhliða stundakennslu við Háskóla Íslands. Hún varð lektor árið 2011, fékk framgang í stöðu dósents árið 2014 og í stöðu prófessors árið 2021. Undanfarin tvö ár sat hún í stjórn og samninganefnd Félags prófessora við ríkisháskóla.

Undir Rögnu sem aðstoðarrektor menntunar og starfsumhverfis heyra málefni kennslusviðs, bæði þau sem snúa að nemendaráðgjöf og að umbótum í kennslu. Þá mun Ragna leiða ýmsar nefndir sem lúta að ráðningum, mati á störfum, framgangi og kjaramálum og enn fremur mótun áherslna Háskóla Íslands á sviði sjálfbærni- og umhverfismála, jafnréttismála og samfélagsvirkni og þjónustu.