პავლე მოსულიშვილი

პავლე მოსულიშვილი (დ. 19??, საქართველო — გ. 1948, საფრანგეთი) — ქართველი მწერალი და ლოტბარი.

ბიოგრაფია

პავლე მოსულიშვილი იყო პუბლიცისტი, 1898-1899 წლებში ყოველდღიურ გაზეთ „ცნობის ფურცელში“ (რედაქტორ-გამომცემელი: ვალერიან გუნია, 1896-1899 წლებში) სისტემატურად აქვეყნებდა სტატიებს, წერილებსა და კორესპონდენციებს სხვადასხვა საკითხებზე. მისი ფსევდონიმები იყო: „ბანი“ და „პავლე მოს - შვილი“.

ემიგრაციაში წასვლის მერე იმყოფებოდა სტამბოლში, სადაც 1922 წელს ქართველ კათოლიკეთა სავანეს სტამბაში წიგნად გამოსცა თავისი პიესა.

1920-1930 წლებში პარიზში ხელმძღვანელობდა ქართველ მომღერალთა გუნდს. 1930 წლის 5 ივლისს პარიზში სასულიერო მოღვაწეებმა საქართველოს ეროვნული გმირის, ქაქუცა ჩოლოყაშვილის პანაშვიდი გადაიხადეს, საგალობლებს ასრულებდა ქართული გუნდი პავლე მოსულიშვილის ლოტბარობით.

1938 წელს 15 წელი შეუსრულდა ემიგრაციაში მოღვაწე ლოტბარის და დრამატურგის პავლე მოსულიშვილის ქართველ მომღერალთა გუნდს. ამ თარიღთან დაკავშირებით, ქართული ემიგრანტული ჟურნალის, „სამშობლოს“ რედაქციამ თხოვნით მიმართა იმხანად მედიცინის სფეროში მომუშავე, მაგრამ, იმავდროულად, ქართული მუსიკალური კულტურის ზედმიწევნით მცოდნე ელა (ელენე) წერეთელს, რომ მიმოხილვითი ხასიათის წერილი დაეწერა. აღნიშნული ჟურნალის 1939 წლის იანვრის ნომერში (N 27) გამოქვეყნდა სტატია „ქართული სიმღერა საფრანგეთში. ლოტბარი“.

წიგნები

• შენ ხარ მზე (ოთხმოქმედებიანი ფანტასტიური ეტიუდი საქართველოს პოლიტიკურ ცხოვრებიდან), დაწერილია ლტოლვილობის დროს ქ. კონსტანტინეპოლში, 1922 წელს - კონსტანტინეპოლი, ქართველ კათოლიკეთა სავანეს საბეჭდავი, 111 გვერდი, 1922

ლიტერატურა

საითიძე გ., ქაიხოსრო (ქაქუცა) ჩოლოყაშვილი (დოკუმენტური თხრობა), თბ., საოჯახო ბიბლიოთეკა, 2012 - ISBN 978-9941-438-06-6

რესურსები ინტერნეტში

• პავლე მოსულიშვილი — საქართველოს ბიოგრაფიული ლექსიკონი
• პავლე მოსულიშვილი - „შენ ხარ მზე“
• „სხვა-და-სხვა ამბავი. ქალაქი მარსელი“ (დასაწყისი), გაზეთი „ცნობის ფურცელი“, # 847, კვირა, 20 ივნისი, 1898-1899
• „სხვა-და-სხვა ამბავი. ქალაქი მარსელი“ (გაგრძელება და დასასრული), გაზეთი „ცნობის ფურცელი“, # 848, სამშაბათი, 22 ივნისი, 1898-1899