Salamo faha-104

Ny Salamo faha-104 dia salamo ao amin' ny Bokin' ny Salamo ao amin' ny Baiboly. Tafiditra ao amin' ny fizaràna atao hoe "boky fahefetra" (Sal. 90 -106) ity salamo ity. Ny Salamo faha-103 no eo alohany ary ny faha-105 no manaraka azy.

Lahatsoratra

Dikan-teny katôlika

¹Misaora an'ny Tompo, ry fanahiko!

Iaveh Andriamanitra ô, lehibe tsy manampetra hianao!

Mitafy fiandrianana amam-pamirapiratana hianao!

      ²Mihodidina amin'ny fahazavana toy ny amin'ny lamba izy,

mamelatra ny lanitra toy ny lay.

      ³Manorina ny fonenany amin'ny ranon'ny lanitra,

manao ny rahona ho kalesiny;

mandeha amin'ny elatry ny rivotra.

      ⁴Manao ny rivotra ho irany,

ary ny lelafo ho mpanompony.

      ⁵Manorina ny tany eo amin'ny fanorenany izy,

ka tsy mihetsiketsika mandrakizay io.

      ⁶Nahodidinao azy, toy ny lamba, ny rano lalina,

ka saron'ny rano ny tendrombohitra.

      ⁷Saingy nandositra teo anoloan'ny fanandrinanao ireny,

lasa nirifatra aman-tahotra noho ny feon'ny kotrokoranao izy.

      ⁸Dia nitranga ny tendrombohitra, nilempona ny lohasaha,

teo amin'ny toerana voatendrinao ho azy avy.

      ⁹Nanisy faritra tsy hihoaran'ny rano hianao,

ka tsy hiverina hanarona ny tany intsony ireny.

      ¹⁰Mandefa loharano amin'ny lohasaha izy

dia mandeha eny anelanelan'ny tendrombohitra ireny;

      ¹¹hisotroan'ny biby any an-tsaha ireny,

ary hankanesan'ny ampondra dia hanala ny hetahetany.

      ¹²Mitoetra eny amorony eny ny voromanidina;

sady mampanakoako ny feony, eny amin'ny ravinkazo izy ireo.

      ¹³Manondraka ny tendrombohitra, avy eny amin'ny fonenany avo izy;

ny vokatry ny asanao no ivokisan'ny tany.

      ¹⁴Mampaniry ahitra ho an'ny biby fiompy izy,

mbamin'ny zava-maniry ho an'ny olombelona:

mamoaka hanina avy amin'ny kibon'ny tany izy,

      ¹⁵mbamin'ny divay izay mampifaly ny fon'ny olona,

omeny diloilo izy hahamandina ny tavany,

ary mofo mankahery ny fony.

      ¹⁶Feno ranony ny hazon'ny Tompo,

mbamin'ny sederan'i Libàna izay namboleny.

      ¹⁷Manao ny akaniny eo ny vorona,

mbamin'ny vano izay mitoetra ao amin'ny sipresa;

      ¹⁸ny tendrombohitra avo, ho an'ny osy dia,

ary ny harambato ialofan'ny jeriboazy.

      ¹⁹Ny volana nataony ho famantarana andro;

ary ny masoandro mahalala ny ora filentehany.

      ²⁰Mampiavy ny aizina izy, ka alina ny andro,

dia mihetsiketsika miaraka amin'izay ny biby rehetra any an'ala.

      ²¹Mierona maniry toha, ny liona tanora,

mangataka ny haniny amin'Andriamanitra.

      ²²Miposaka ny masoandro dia mihataka ireny

ka lasa mamitsaka any an-davany.

      ²³Ny olombelona mivoaka amin'izay ho any amin'ny asany;

sy ho any amin'ny raharahany mandra-paharivan'ny andro.

      ²⁴Akory ity hamaroan'ny asanao, ry Iaveh:

nataonao tamim-pahendrena izy rehetra.

Henika ny harenao ny tany.

      ²⁵Indro ny ranomasina, sady lehibe no malalaka;

iriariavam-biby tsy hita isa, ao ny kely, ao ny lehibe.

      ²⁶Mivezivezy ao ny sambo,

mbamin'ny leviatana nataonao hilalao eo amin'ny onja.

      ²⁷Izy rehetra miandry anao,

hanome ny haniny amin'ny fotoany.

      ²⁸Manome azy hianao, dia mandray izy;

manokatra ny tànanao hianao, dia voky ny soa avy aminao izy.

      ²⁹Manafina ny tavanao hianao, dia raikitahotra izy;

alanao indray ny fofon'ainy, dia maty izy,

ka miverina indray amin'ny vovoka.

      ³⁰Maniraka ny fofon'ainao hianao, dia hary ireny;

ary manavao ny tarehin'ny tany hianao.

      ³¹Haharitra mandrakizay anie ny voninahitry ny Tompo!

Hifaly amin'ny asany anie Iaveh!

      ³²Mijery ny tany izy dia mihorohoro io;

manendry ny tendrombohitra izy dia midonaka ireny.

      ³³Sitrako ny mihira ho an'ny Tompo, ny andro rehetra iainako,

sy mankalaza ny Andriamanitra raha mbola misy koa aho.

      ³⁴Ho sitrany anie ny hirako,

fa izaho, dia Iaveh no nataoko fifaliako.

      ³⁵Ho fongotra eto an-tany anie ny mpanota,

ary tsy hisy intsony ny ratsy fanahy!

Misaora an'ny Tompo, ry fanahiko. Alleloia!

Jereo koa

• Boky voalohany: Sal. 1 - 2 - 3 - 4 - 5 - 6 - 7 - 8 - 9 - 10 - 11 - 12 - 13 - 14 - 15 - 16 - 17 - 18 - 19 - 20 - 21 - 22 - 23 - 24 - 25 - 26 - 27 - 28 - 29 - 30 - 31 - 32 - 33 - 34 - 35 - 36 - 37 - 38 - 39 - 40 - 41.

• Boky faharoa: Sal. 42 - 43 - 44 - 45 - 46 - 47 - 48 - 49 - 50 - 51 - 52 - 53 - 54 - 55 - 56 - 57 - 58 - 59 - 60 - 61 - 62 - 63 - 64 - 65 - 66 - 67 - 68 - 69 - 70 - 71 - 72.
• Boky fahatelo: Sal. 73 - 74 - 75 - 76 - 77 - 78 - 79 - 80 - 81 - 82 - 83 - 84 - 85 - 86 - 87 - 89.
• Boky fahefatra: Sal. 90 - 91 - 92 - 93 - 94 - 95 - 96 - 97 - 98 - 99 - 100 - 101 - 102 - 103 - 104 - 105 - 106.
• Boky fahadimy: Sal. 107 108 - 109 - 110 - 111 - 112 - 113 - 114 - 115 - 116 - 117 - 118 - 119 - 120 - 121 - 122 - 123 - 124 - 125 - 126 - 127 - 128 - 129 - 130 - 131 - 132 - 133 - 134 - 135 - 136 - 137 - 138 - 139 - 140 - 141 - 142 - 143 - 144 - 145 - 146 - 149 - 150.

• Salamo apôkrifa: Salamo faha-151 - Salamo faha-152 hatramin' ny faha-155.