Na contrà dël borgh vèjGarbagna a l'é stàita fondà ant l'àuta Età 'd Mes: sò teritòri a l'é cità ant un diplòma dël rèUgo 'd Provensa dël 29 ëd mars 945. Ël borgh a ven an pressa a trovesse ant la sfera d'influensa ëd Torton-a e a la fin dël sécol ch'a fa X l'imperador Oton II ëd Sassònia a conferma 'l possess ëd l'abità 'd Garbagna ai vësco-cont ëd Torton-a, ch'a-i costruisso 'n castel për sorvelié mej l'acess a la Val dla Grua. Dël sécol ch'a fa XIV ël castel a l'é concedù dai Viscont ëd Milan al soldà 'd ventura Anichin ëd Baumgarten, ch'a lo vend a la famija genoèisa dij Fiesch. Për vàire agn ël castel a pendrojerà antra ël domini ëd Torton-a, sità fidel ai Viscont, e la giurisdission direta dij Fiesch. Dël 1495 Gian Luis Fiesch a oten da l'imperador Massimilian I d'Asborgh la conferma dël possess ëd la Val dla Grua e la costitussion dël Feod Imperial, valadì un teritòri ch'a dependìa diretament da l'Imperi Roman Sacrà, tanme àutr ant l'Oltragiov geonèis. Dël 1547 la famija dij Fiesch a faliss na congiura contra Andrea Doria për pié 'l podèj ant la Repùblica ëd Genoa; dël 1548, l'imperador Carl V d'Asborgh, ch'a sostenìa la Repùblica genoèisa, a passa ad Andrea Doria tùit ij Feod Imperiaj dij Fiesch.
Contut che dal 1738 a ven-a butà sota la protession dij Savòja, Garbagna a resterà feod autònom sota ij Dòria fin al 1797, quand che a darà soa adesion prima a la Repùblica Ligure e peui a l'Imperi Fransèis ëd Napoleon Bon-a-part. Dël 1815 a intra ant ël Regn ëd Sardëgna ant la Divison (peui Provinsa) ëd Lissandria, ant la Provinsa (peui Sircondari) ëd Torton-a e a cap d'un Mandament.