Spanyol

Kerajaan Spanyol
Reino de España (Spanyol)
Regne d'Espanya (Katalan)
Espainiako Erresuma (Basken)
Reino de España (Galisi)
Reiaume d'Espanha (Oksitan)

Ibu negeri

Madrit

Nama pengendek

Spanyol
Spaniar

Spanyol (hurup Arab Gundul: سفاڽول atawa اسفاڽول; basa Spanyol: España; basa Katalan: Espanya; basa Basken: Espainia; basa Galisi: España; basa Oksitan: Espanha) atawa resminya Kerajaan Spanyol (hurup Arab Gundul: کراجأن اسفاڽول; basa Spanyol: Reino de España; basa Katalan: Regne d'Espanya; basa Basken: Espainiako Erresuma; basa Galisi: Reino de España; basa Oksitan: Reiaume d'Espanha) atu negara di Èropa Kidul. Pasnya, ni negara ada di Semenanjung Ibèri. Ni negara watesan ama Prasman, Portugal, Andora, ama Jabal Tarik. Sabtah èn Mélila watesannya ama Magrib di Aprika Lor. Di belah lor-wètannya Spanyol ada Pegunungan Pirénéen.

Orang Spanyol bisa digero' orang Spanyol (hurup Arab Gundul: اورڠ اسفاڽول) atawa orang Spaniar (hurup Arab Gundul: اورڠ اسفانيار). Dia pada ngomongnya basa Kastilian atawa basa Spanyol (basa Spanyol: Castellano atawa Español). Di laèn bilangan, orang juga' ada nyang ngomongnya laèn basa, kaya': basa Katalan, basa Basken, basa Asturi, basa Galisi, basa Léoni, basa Aragon, basa Oksitan Aranis, èn hata basa Portugis. Agama nyang dianut ama sekitar 56% penduduknya entu agama Serani Katolik Romèn.

Semprakan tahon 1975, Spanyol entu negara kerajaan konstitusionil. Raja Spanyol sekarang entu Raja Pilip VI nyang belakon berales wèt dasar. Parlemènnya digero' Hopraden Umum (Las Cortes Generales) nyang ada punya dua pangkèng, ya'entu: Konggrès Perwakilan (El Congreso de los Diputados) èn Sènat (El Senado). Ni pada dipilih ama orang liwat pemilian umum. Istana guwenemèn ama raja ada di Madrid, hopstadnya^[1] Spanyol.

Spanyol ada punya luas lebi deri 5.000 km² daratannya. Ni negara èmang lebi kecil deri Prasman, cuman lebi gedé deri Dètslan. Ampir 50 jutaan orang ada tinggal di Spanyol. Spanyol kebelèk jadi 17 kuminitèt otonom (artinya saban kuminitèt ada hak ngurus sendèwèk). Saban kuminitèt ada punya dia punya rehèringnya^[2] sendèwèk-sendèwèk.

Spanyol juga' bekèn ama plamèngkonya nyang biasanya dilakonin ama kaum Kalo (Caló).

Ruju'an

↑ Hopstat atawa hopstad (hurup Arab Gundul: هوفستت atawa هوفستاد) – ibukota (Indo.); capital (Ing.); hoofdstad (Wld.).
↑ Rehèring (hurup Arab Gundul: رهيريڠ atawa رخيريڠ) – pemerintah, administrasi (Indo.); government, administration (Ing.); regering (Wld.).

[1] Hopstat atawa hopstad (hurup Arab Gundul: هوفستت atawa هوفستاد) – ibukota (Indo.); capital (Ing.); hoofdstad (Wld.).

[2] Rehèring (hurup Arab Gundul: رهيريڠ atawa رخيريڠ) – pemerintah, administrasi (Indo.); government, administration (Ing.); regering (Wld.).

[1]

[2]