Santiago Meabe

Santiago Meabe
Bizitza
Jaiotza	Bilbo, 1878ko ekainaren 5a
Herrialdea	Bizkaia, Euskal Herria
Heriotza	Bilbo, 1961eko urriaren 25a (83 urte)
Familia
Haurrideak	ikusi Tomás Meabe
Hezkuntza
Hizkuntzak	gaztelania
Jarduerak
Jarduerak	politikaria
Sinesmenak eta ideologia
Alderdi politikoa	Eusko Abertzale Ekintza

Santiago Meabe Bilbao (Bilbo, Bizkaia, 1878ko ekainaren 5a - ib., 1961eko urriaren 25a) politikaria izan zen, eusko abertzalea. Oso ezaguna ez den arren, ezker abertzalearen aitzindaritzat jo dute adituek.

Bizitza

Tomas Meaberen anaia zen, eta harreman estuak izan zituen harekin, ideologiaz harengandik urrun egon arren. Merkataritza-ikasketak egin zituen. Bere lehen euskara irakaslea Resurreccion Maria Azkue izan zen, eta Sabin Aranaren lehen jarraitzaileetakoa izan zen. La Patria astekariaren zuzendari izan zen 1901-1903 urteetan, eta Aberri astekariaren zuzendari 1906tik aurrera.

Anaiaren antzera, biziki kezkatu zuen langileen arazoak. 1920. urtetik aurrera, ELA-SOV sindikatuaren errebindikazioak indartzearen aldeko agertu zen, eta abertzaletasuna eta sozialismoa politika-egitarau zehatz batean uztartzen saiatu zen, Ferdinand Lassalleren ideologiaren ildotik.

1930ean, ezker abertzalearen aldeko joera berria onartu, eta ANVko kide egin zen. Urte batzuen buruan alderdi hura utzi, eta independente gisa iraun zuen, hil zen arte.

Markina aldeko arduradun egin zuen Eusko Jaurlaritzak 1936an, Espainiako Gerra Zibilaren garaian, eta Normandiara jo zuen, erbesterako bidean, 1937an. Baionan bizi izan zen, Bilbora itzuli baino lehen.

Erreferentziak

• Artikulu honen edukiaren zati bat Lur hiztegi entziklopedikotik edo Lur entziklopedia tematikotik txertatu zen 2011/12/27 egunean. Egile-eskubideen jabeak, Eusko Jaurlaritzak, hiztegi horiek CC-BY 3.0 lizentziarekin argitaratu ditu, Open Data Euskadi webgunean.

• Datuak: Q12267030