Ky program drejtshkrimi i gjuhës shqipe është produkt i punës së vyer të gjuhëtarëve dhe të Akademive mbarëshqiptare të Shkencave.
Mbi 1 milion fjalëforma janë përftuar nga zbatimi i rregullave të "Drejtshkrimit të gjuhës shqipe" (1973), duke u bazuar pikësëpari te "Fjalori i madh i gjuhës shqipe" i vitit 2026, si dhe duke analizuar "Fjalorin e gjuhës së sotme shqipe" (1980), "Fjalorin e gjuhës shqipe" (2006) dhe "Fjalorin drejtshkrimor të gjuhës shqipe" (2015). Fjalësi aktual është ndër më të pasurit për shqipen, që mundësohet falas në internet.
Me gjithë përpjekjen për të pakësuar të metat nga hedhja me dorë e rregullave të drejtshkrimit, ka vend për vërejtje. Prandaj më kontaktoni nëse vini re gabime dhe mund të më sugjeroni fjalë a kategori gramatikore që mungojnë.
Ju falemnderit hartuesve të veprave të mësipërme:
— (1973) Androkli Kostallari, Mahir Domi, Eqrem Çabej, Emil Lafe.
— (1980) Androkli Kostallari, Jani Thomaj, Xhevat Lloshi, Miço Samara, Josif Kole, Palok Daka, Pavli Haxhillazi, Hajri Shehu, Ferdinand Leka, Emil Lafe, Kornelja Sima, Thanas Feka, Beatriçe Keta, Agim Hidi.
— (2006) Jani Thomai, Miço Samara, Pavli Haxhillazi, Hajri Shehu, Thanas Feka, Valter Memisha, Artan Goga.
— (2015) Ali Dhrimo, Rami Memushaj.
— (2026) Jani Thomai, Valter Memisha, Shezai Rrokaj, Dhimitër (Miço) Samara, Shefkije Islamaj, Gjovalin Shkurtaj, Ali Jashari, Anila Omari, Anila Kananaj, Artur Lama, Abdurrahim Maxhuni, Idriz Metani, Juljana Kume, Mimoza Priku, Naim Berisha, Rozana Rushiti, Teuta Toska, Rrezarta Draçini, Sejdi Gashi, Manjola Zaçellari, Behar Hoxhaj, Resul Telhaj, Olger Brame, Engjëllushe Karaj, Petrit Zeneli, Viktor Bakillari.
Ky program mund të tregojë gabimet drejtshkrimore në gjuhën shqipe. Përdoret në aplikacionet si LibreOffice dhe OpenOffice, të cilat shfrytëzojnë paketën hunspell për drejtshkrimin.
Instalimi në LibreOffice kryhet nëpërmjet "përgjegjësit të funksioneve shtesë" (Extension Manager). Fillimisht ju duhet varianti më i fundit i korrektorit, të cilin e gjeni te Releases.
Më tej, hapni një dokument të çfarëdoshëm dhe sigurohuni që të keni aktivizuar gjuhën shqipe për drejtshkrimin në LibreOffice.
Dalloni fjalët e nënvizuara me të kuqe, sepse mund të jenë shkruar gabim. Kur i klikoni nënvizimet me tastin e djathtë të mausit, ju sugjerohet të korrektoni fjalën e gabuar ose ta shtoni në fjalorin personal të LibreOffice, në rast se jeni të sigurt që është shkruar saktë.