Grillgenser med rundfelling

Grillgenseren frå Dale er ein klassikar og dukka opp på nytt i heftet Urban Retro for nokre år sidan. Genseren skal eigentleg har isydde ermar, men eg valde å gjere om til rundfelling.

Her er originalen, bilde er frå Dalegarn.

Eg har strikka i originalgarnet (Dale Alpakka) og i originalfargane (naturkvit, beige melert, koksgrå melert og sjøgrøn). 

Vrangbordene er strikka på pinnar nummer 3, resten på pinnar nummer 3,5.

Mønsteret passa bra til å gjere om til rundfelling, det viktigaste var å felle slik at mønsteret ikkje kom skeivt ut. Eg strikka i storleik Small.

Rallargenser

Rallargenser er ei gratisoppskrift frå Dalegarn. Eg har strikka den på bestilling i originalgarn og -fargar. 

Garnet er alpakka frå Dale og fargane er grå, natur og koksgrå. (Litt vanskeleg å få fram rette fargane no i desemberlyset..)

Genseren er strikka på pinnar nr 2,5 (vrangbordene) og 3. Eg er ikkje så veldig glad i å strikke av alpakka, eg synest det er litt vanskeleg å det fint og jamnt, men Dalegarnet var ei positiv oppleving.

Så då er det berre å krysse fingrane for at genseren passar mottakaren.

RETRO: VM-genser?

Denne genseren dukka opp i barndomsheimen. Eg strikka den til systera mi ein gong på 80- eller 90-talet.

Genseren er truleg strikka i Heilo og då er det etter alt å døme snakk om eit mønster frå Dalegarn. Kan det vere ein VM-genser.....?

Fine fargar!

Passar fint til åtteåringen, kanskje den er i str 10 år?

"Stor jakke til kalde dagar"

Jepp, jakka heiter "Stor jakke til kalde dagar". Oppskrifta fann eg i boka Strikk med raske pinner av Kristin Wiola Ødegård. 

Oppskrifta er lagt opp til at ein skal bruke Verdi og Fabel Mouline frå Garnstudio, men eg valde heller ein eigen vri: ein tråd Drops Air og ein tråd Dale Royal Alpakka. Sistnemnde frå lageret, frå den gongen Dale produserte garnet sitt her i Noreg.

Eg brukte pinnar nummer sju og strikka etter oppskrifta, som er one size. Jakka vart akkurat passe stor til tretteåringen.

Lommer! Dei er strikka som firkantar og sydde på til slutt

Lothepus igjen

Denne lua rakk eg berre å knipse nokre raske mobilbilde av, før den forsvann ut døra på veg til mottakaren.

Lothepuslua er strikka i Pure Eco Wool på pinnar nummer fire. Eg la opp 96 maskar. 

Oppskrifta finn du her.

Detaljar....

Rosa Lothepuslue

Denne Lothepuslua er strikka i to gråfargar, to rosafargar og ein liten rest lilla.  Eg la opp 88 maskar på pinnar nr 4.  Strikka i originalgarnet Dale Pure Eco Wool.

Lue med vrange slangar

Det dukka opp eit behov for ei gåve til ein gut.  Då vart denne lua til, strikka i økologisk ull frå Dale på pinnar nr 4. Eg brukte tre fargar: blått, grått og grønt.

Eg la opp 90 maskar og strikka vrangbord ein rett, ein vrang. Så auka eg ti maskar og strikka sju omgangar rett med blått. Så ein omgang rett og fire omgangar vrangt med grønt.  Byta mellom grønt og grått på desse vrange partia.

Åtteåringen synest dei grå og grøne partia ser ut som slangar.

Alle skal få!

Om eg kunne strikke Lothepusluer til alle jentene i tredje klasse...?  Klart eg kunne! Heldigvis er det berre fem jenter i klassa til åtteåringen, og sidan ho allereie hadde fått ei Lothepuslue, var det berre å strikke fire til.   Alle luene er strikka i originalgarnet Dale Pure Eco Wool på pinnar nr 4. Ei lue fekk koksgrå som hovudfarge og lys lilla som kantfarge.

Denne har lys grå som hovudfarge og lys lilla som kantfarge.

Her er det lilla kantfarge og grå som hovudfarge.

Denne har lys rosa kantfarge og sandbeige som hovudfarge.

På alle luene la eg opp 96 maskar. 

Oppskrifta er gratis frå Dale, her hos TV2 finn du den.

Lothepuslue

Åtteåringen anar ikkje kven Lothepus er.  Eg veit ikkje så mykje om han eg heller, men har fått med meg at han har mange fine strikkaplagg, til dømes i Kjendis Farmen.  Dette er altså ei Lothepuslue, strikka på pinnar nummer 4 i originalgarnet Dale Pure Eco Wool.

"Mamma, heiter lua LODDEN KATT, eller noko sånt..?", spurde ho, etter at ein lærar hadde kommentert lua.  Tja, to sider av same sak...?

Ekstremt dårlege bilde- seier meg lei for det- dei er tekne under eit gatelys på veg til skøyteisen.  Elles likte eg garnet veldig godt. Nydeleg å strikke av, og med pinnar nummer fire går det raskt unna.  Eg la opp 96 maskar i staden for 120, for at det skulle passe eit barnehovud.

Lilla og grå mariusgenser

Ikkje snø, men kaldt likevel!  Denne mariusen er ein tru kopi av denne:  http://lindeik.blogspot.no/2015/02/mariusgenser.html

Genseren er i str S og er strikka i Falk frå Dale i fargane lilla, lys og mørk grå. Garnet kjøpte eg på tilbod på nyåret, då siste rest av norskprodusert Dalegarn skulle seljast ut.

Ludviggenser

Eg er ingen stor fan av alpakka, men eg har ein del årgangsalpakka frå Dale (norskprodusert) liggande i garnlageret. Litt av det er no omgjort til ein  Ludviggenser.  Oppskrifta fann eg i Klompelompeboka.

Fargane er koksgrå, lys grå og blass gul. Eg synest det vart ein ok kombinasjon!

Genseren er strikka på pinnar 2,5/3,5 i str 6 år.  Oppskrifta er enkel, godt forklart og lett å følgje. Og eg elskar genserar med rundfelling.

Det er alltid utfordrande å få jamn mønsterstrikk med alpakka, men etter litt forsiktig damping vart det ikkje så verst, gitt.