Vardetunika

Denne tunikaen var ferdig for mange veker sidan, men eg har verken rukke å bruke den eller skrive om den her på bloggen før. Det er ein Vardetunika, mønster og garn er frå Raumagarn.

Tunikaen er strikka av Rauma sitt finullgarn, pinnar nummer tre og str L. 

Fargane er to brunfargar, brent oransje og lys beige. 

No er det berre å vente på vinteren, slik at eg endeleg får brukt tunikaen:-)

 

Regnbogekjole

Alle gode ting er tre. Tidlegare har eg strikka to slike regnbogekjolar, den første kan du sjå her, den andre er her.  Dette tredje eksemplaret er eit bestillingsverk.  Strikka frå halsen og ned på pinnar nummer 3. Det grå garnet er Baby Panda frå Rauma, medan Kauni har æra for dei vakre regnbogefargane.

Heile sju knappar på høgre side. Knappane er mørkegrå. Det gjekk med ca 180 gram Baby Panda og ca eit halvt nøste Kauni, dvs ca 75 gram.

Bestillaren ville ha ein kjole i str sju år.  Trur det skal passe bra, sjølv om den på åtteåringen (ho 140 cm) er meir som ein tunika. 

Graziela-kjole

Har du høyrt om den tyske designaren Graziela Preiser?  Det ho laga av stoff og sengetøy var svært populært på 1970-talet.  No har dottera Nina relansert mønstera, og denne kjolen er sydd av eit slikt byGraziela-stoff.

"Eg likar ikkje oransje, mamma, men eg kan sikkert klare å bruke kjolen." Sjuåringen har endra smak- i mange år hadde ho oransje som sin absolutte favorittfarge.  Motstanden mot oransje botnar nok mykje i at erkerivalen på fotballfronten, Aalesund, har oransje drakter...

Kjolen er sydd etter same mal som alle kjolane eg har sydd (never change a winning team..). Forstykke, bakstykke, to ermar og strikk i halskanten.

Vil du lese meir om byGraziela? Du finn heimesida her: http://www.bygraziela.com/?___store=bygraziela_en&___from_store=bygraziela_de

Her seks kjolar samla, tre vart sydde i fjor sommar, to i sommar og den siste er arvegods frå storesystera- sydd for cirka fem år sidan.

Kjolane er suverene til bade bytur og strandtur, dei er mjuke og lette.

Katvig-kjole

Eg er ingen syar. Likevel er sying noko av at det artigaste eg veit!  Som regel syr eg berre om somrane og førebels er eg veldig einspora: eg syr kjolar.   Tradisjonen tru har eg også denne sommaren sydd kjolar til yngstejenta.

Mange vil nok kjenne igjen mønsteret på stoffet. Jepp, dette er eit Katvigstoff. Eit godt brukt juniordynetrekk har fått nytt liv som mjuk og romsleg kjole, og skal få lufte seg både i London og Oslo dei næraste vekene.

Kjolen er sydd av fire delar: forstykke, bakstykke og to ermar. I halsen er det løpegang med strikk.  Eg diggar å sy av brukte dynetrekk, rett og slett fordi stoffet er så mjukt og fordi eg likar gjenbruk. Og så er det kjempepraktisk med plagg som kan vaskast på seksti grader!

Kjolen er i cirka str 10 år, og det er igjen nok stoff til å sy ein litt mindre kjole.

Katvig har laga sengesett i dette mønsteret i mange fargar, det finst i til dømes blått, grønt, brunt, raudt og gult.

Godkjent!

Ein heil regnboge

Etter at eg la ut dette blogginnlegget for tre veker sidan, fekk eg bestilling på ein slik regnbogekjole.  No er bestillingsverket ferdig og avfotografert i nyvaska tilstand i surt vinterver.

Det grå er Sisu, medan Kauni står for dei fine regnbogefargane.

Det gjekk med nesten 200 gram Sisu og ca 75 gram (eit halvt nøste) Kauni.  Eg strikka på pinnar nr 3,5 og strikka frå halsen og ned.

Eg har ikkje oppskrift til kjolen, så eg strikkar berre på gefühlen.  Kjolen er sånn cirka i str 10 år.

Somewhere over the rainbow.....

Uveret Tor har herja frå seg og etterlet seg eit fint snødryss.  Dermed var det endeleg lyst nok til å ta bilde av nyaste strikkakjolen.

Kjolen er strikka frå halsen ned på pinnar nummer 3,5.   Det grå er Pickles pure wool, fargen heiter Røyksignal.  Og regnbogefargane er Kauni EQ.  Fantastisk å kunne strikke eit plagg med så mange fargar utan å feste meir enn 4-5 trådar!

Berestykket er strikka fram og tilbake, slik at det vart riller. Kjolen er open på venstre skuldar og har fått fem treknappar forma som soler der.

Den observante lesar vil legge merke til at kjolen og lua har det same mønsteret. Jepp, eg vart inspirert av To vrange si Dottylue og har altså brukt prikkemønsteret på kjolen også.

Kjolar til systre

Fønvind og tolv plusgrader. Då passar det med sommarkjolar, sjølv om det er aldri så mykje desember.

Kjolane er sydde i bomullsstoff frå Panduro, og på hovudstoffet er det små mus og blomster.

Kjolane er i str. 6 og 2 år, og forsvann som julegåver til to systre.

Restestripekjole

Eg har eit ganske stort garnlager (kremt), som eg meir eller mindre heilhjarta prøver å redusere.  Denne kjolen er strikka av Kauni-restar av to ulike nøster, og 100 gram tretråds Albulita merinoull frå Pickles.   Tidlegare i sommar strikka eg ein liknande kjole, berre med breiare striper. 

Sommarfuglknapp!

Eg synest Kauni har fine fargeskift, og det er alltid veldig motiverande og spennande å strikke slike plagg.

Kjolen er strikka frå halsen og ned, og passar frå ca. 7 år, vil eg tru. Denne skal gjevast vekk i gåve i haust.

Dette vart feriestrikket mitt: eg la opp kjolen på flyet på veg til London. I London vart det strikka veldig lite. Litt meir strikking vart det i Oslo, medan det vart masse strikking då vi var i Mikkelparken i Kinsarvik.