Ibda, immaniġġja u kabbar negozju
L-Ewropa hi mimlija b’opportunitajiet ta’ negozju. Hu importanti li tkun taf ir-regoli f’dak li għandu x’jaqsam mat-twaqqif ta’ negozju, inklużi t-taxxa fuq il-valur miżjud (VAT) u d-dwana, l-istandards tal-prodotti, u l-impjieg. Jeżistu wkoll diversi fondi tal-UE li tista’ tibbenefika minnhom bħala negozju żgħir.
Sib informazzjoni dwar
- kif tista’ tniedi n-negozju tiegħek u x’inhuma r-rekwiżiti legali. Sib ukoll informazzjoni dwar kif tipproteġi l-ideat tan-negozju tiegħek, ir-regoli dwar il-kontijiet annwali u l-fużjonijiet ma’ kumpaniji barranin, u kif tista’ tagħmel l-aħjar użu mill-iskema ta’ skambju tal-istaff.
- ir-regoli dwar il-VAT u d-dazji tad-dwana, id-dazji tas-sisa, il-kumpaniji prinċipali u s-sussidjarji tagħhom, it-taxxa korporattiva, jew iċċekkja jekk negozju huwiex irreġistrat biex jagħmel kummerċ fl-Ewropa (numru tal-VAT tal-UE).
- standards u konformità tal-prodotti. L-istandards huma linji gwida volontarji li jipprovdu speċifikazzjonijiet tekniċi għal ċerti prodotti, servizzi u proċessi biex jgħinu fil-protezzjoni tal-ambjent u fis-saħħa tal-konsumatur. Qabel ma tkun tista’ tbigħ prodott f’pajjiż tal-UE, dan irid ikun konformi mar-regoli li japplikaw f’dak il-pajjiż u kullimkien fl-UE.
- impjiegi u benessri tal-istaff. Sir af dwar ir-rekwiżiti stabbiliti mil-liġi tal-UE dwar it-termini ta’ impjieg għall-istaff, it-tibdil fil-kuntratti tax-xogħol u dwar l-informazzjoni u l-konsultazzjoni tal-istaff. Hemm ukoll regoli speċifiċi għall-ħaddiema fis-settur tat-trasport u għall-ħaddiema stazzjonati (impjegati reklutati f’pajjiż wieħed iżda impjegati f’ieħor).
Appoġġ lin-negozji żgħar u ta’ daqs medju
In-negozji żgħar u ta’ daqs medju huma s-sinsla tal-ekonomija tal-Ewropa, u jirrappreżentaw 99% tan-negozji kollha fl-UE. Għalhekk huma essenzjali għall-ambizzjoni doppja tal-UE biex tinħoloq ekonomija sostenibbli u diġitali.
L-UE toffri appoġġ lin-negozji ż-żgħar permezz tal-awtoritajiet lokali, reġjonali jew nazzjonali. L-intermedjarji finanzjarji bħal banek u ditti ta’ kapital ta’ riskju jipprovdu wkoll finanzjament fil-forma ta’ self garantit mill-UE, lokazzjoni finanzjarja u finanzjament ta’ ekwità.
Ibbrawżja l-għażliet ta’ finanzjament fuq il-Portal tal-UE għall-Finanzjament u għall-Offerti li jiġi wkoll bħala app tal-mowbajl komda. Disponibbli kemm fuq Android kif ukoll fuq iOS, din tiggarantixxi aċċess flessibbli għas-servizzi ta’ finanzjament tal-UE fi kwalunkwe ħin, kullimkien.
Iċ-ċittadini kollha tal-UE jistgħu japplikaw għal finanzjament tal-UE. Il-Portal għall-Finanzjament u għall-Offerti li huwa l-punt ta’ dħul ewlieni għall-programmi ta’ finanzjament u l-għażliet ta’ akkwist ġestiti mill-UE. Tista’ ssib opportunitajiet ta’ finanzjament f’varjetà wiesgħa ta’ oqsma, permezz ta’ programmi ewlenin tal-UE bħal Erasmus+, Orizzont Ewropa u l-Fond Soċjali Ewropew+.
Biex tgħin lin-negozji żgħar u ta’ daqs medju jesportaw u jinvestu lil hinn mill-UE, il-Kummissjoni tipprovdi informazzjoni dwar l-aċċess għas-swieq u opportunitajiet ta’ tlaqqigħ.
Għal pariri u appoġġ ġenerali, ikkuntattja n-Network Enterprise Europe. Dan jgħin lin-negozji ż-żgħar u ta’ daqs medju b’ambizzjonijiet internazzjonali. Issib parir espert, kuntatti u avvenimenti li jqabbduk mas-sħab internazzjonali t-tajba li jgħinuk tkabbar in-negozju tiegħek.