Anára gielddas juohke áidna skuvllas leat fállun nuvttá mánnodávdasuojit ja dat lea gieldda nuoraidstivrra ánsu. Mánnosašsuojit leat oaivvilduvvon dakkár dárbui, jus ovdamearkka dihte mánnodávddat álget fáhkkestaga gaskkan skuvlabeaivvi.
Nuoraidstivra lea skáhppon sujiid skuvllaide iežas bušeahtain. Jahkásaččat nuoraidstivrras lea geavahusas 5 500 euro ja mánnodávdasujiide gollá birrasiid 300 euro.
Go suojit leat álkit fidnemis, de dat lasiha dásseárvvu ja geahpeda maid heahpada dovddu, mii áššái sáhttá láktasit, oaivvilda nuoraidstivrra ságadoalli Ainomaija Mäenpää.
Avvila skuvlaguovddážis mánnodávdasuojit gávdnojit oahppifuolahusa váccahagas. Buohkain lea vejolašvuohta oažžut divrras sujiid nuvttá, iige dáid dárbbaš sierra fitnat jearramin dearvvašvuođadivššáris.
– Buohkathan eai duostta mannat dohko jearrat daid. Dát lea olu álkit, ahte dat leat fidnemis ná. Iige Anára skuvllas oba leatge dearvvašvuođadivššár álot báikki alde, de ii daid álot fitne doppe, čilge Anára nuoraidstivrra čálli Nelli Turunen.
Máhcahat leamašan buorre ja máŋgasat vižžet sujiid ain go dárbbašit.
– Buot vulggii das, ahte muhtimat jearahedje, ahte leago earáin dákkár. De šattai dakkár jurdda, ahte ii dárbbaš šat skihpáriin jearahit sujiid, muitala nuoraidstivrra láhttu Heta Kallioinen.
Gaskabihttáautomáhta ja nuvttá kondomat
Yle lea čielggadan, ahte makkár áššiid nuoraidstivrrat leat ožžon áigái birra Suoma.
Ovdamearkka dihte Humppila gieldda nuoraidstivra diŋgui 500 kondoma Leader-ruhtadeami vehkiin. Ulbmilin lea juohkit daid nuvttá nuoraid dáhpáhusaid oktavuođas ja ná ovddidit nuoraid seksuáladearvvašvuođa.
Polvijärvi gieldda nuoraidlanjain fas leamašan lohpi juhkat energiijajuhkosiid jagi 2023 rájes. Máŋggat nuorat ledje sávvan ášši, go muđuid energiijajuhkosiid jugaše suoli.
Orivesis skuvllalaččat fas besset oasttit unna gaskabihttá automáhtas. Gieldda nuoraidráđis ledje fuobmán, ahte buohkat eai bora skuvlabiebmu. Nuba automáhtas fitne juobe juoidá maid borrat ja de nagoda guhkes skuvlabeaivvi.
Suomas leat badjel čuođi doaibmi nuoraidstivrra ja daid bargun lea ovddidit nuoraid áššiid. Nuoraidstivrrat leat dorvvastuvvon jagis 2015 gieldalágas. Láhka geatnegahttá gielddaid ásahit nuoraidstivrraid vai nuorat ožžot váikkuhanvejolašvuođaid. Lahttun nuoraidstivrrain leat birrasiid 13–20 jahkásaš nuorat, sihke badjedásiin, logahagain go maiddái ámmátskuvllain.
