Saaʹmi tuâlʼjõž valdšmest lij leämmaž vaiggâd kaunnâd ooccjid siidsåbbar piisren.
Saaʹmi siidsåbbar piisartuâjj lij leämmaž ooccâmnalla kueiʹt vuâra ǩeâđđa, jie-ǥa tuõjju leämmaž ni vooʹps oocci, mušttal saaʹmi ouddooumaž Veikko Feodoroff.
– Tõõzz jie puättam ooccmõõžž. Mij piijim oʹđđest da siõmmna hiâlptim tõid kriteeʹrid, što käunnʼjeʹče nåkam oummu. Jie-ǥa ni ââʹn puättam ooccmõõžž ni vooʹps, jie-ǥa ni kõõččmõõžž tõn tuâj pirr, mušttal Feodoroff.
– Lij vaiggâd kaunnâd oummu, da ââʹn mon kååitam mieʹcsted oummu, ǩeâst miõll ǩeäss näkkam tuõjju.
Tuâlʼjõž vaaldâšm lij tättam vieʹǩǩ ministeriatääʹzzest
Siiddsåbbar tuâjjlažkååʹdd vaiggâdvuõđ lie še teâđast: nuʹtt saaʹmi ouddoummu ko še piisar tuâjai vääras lie vaʹrrjum tåʹlǩ 1,5 ooumažtuâjjeeʹjj. Piisar da ouddoummu tuâjaid jie leäkku veerǥla tuâjjsuåppmõõžž.
Piisar tåimm tiudd tuâjjaaiʹjin da ouddooumaž pieʹllpeeiʹv tuâjjaaiʹjin. Tuâjast määuʹset tåʹlǩ pääʹlǩ (lä. palkkio) da tuâjast jie leäkku tuejjuum tuâjjsuåppmõõžž.
Kuhttuid tuâjaid vuäitt paaldeed oskkumtoimmu, ij kudd tuâjjkõskkvuõʹtte.
– Tät lij õhtt vaiggâdvuõtt. Mij-han leäʹp kåittam tän vaiggâdvuõđ ääʹveed da leäʹp viikkâm ääʹšš mädd- da meäʹcctäällministeriaaʹje da tõn leät toʹben õinn seʹlvvteʹmmen, mušttal Feodoroff.
Piisar tuâjjan lij staanâd siidsåbbar, kååʹtt lij sääʹm-meer pââimõs vaaldâšmorgaan. Piisar valmštââll ciâlklmid da såbbrid di hoiʹddai aaʹššid õõutsââʹjest vaalin vaʹlljuum saaʹmi ouddoummuin.
Veikko Feodorooff mieʹldd valmštõõllâmnalla lie mäŋgg jõnn ääʹšš, kook kuõskte ouddmiârkkân Njauddâmjooǥǥ luõss-šeellmõõžž da tuõttvuõtt- da suåvâdvuõttproseeʹss. Nuʹtt siidsåbbri ko še sääʹmsuåvtõõzzi aaʹšši hoiʹddjummuž lie õinn kõskkân.
– Ääʹšš ouddne, leâša tuâjjnueʹđđ meeʹst lâssan. Õhttu âlgg tän orkesteeʹr ââʹn jååʹđted. Lij juʹn määnpââʹjj mõõnnâm, ko meeʹst iʹlla piisar.
