Naŋŋánjárgga hoteallafidnus plánejit ođđa stándarda vásttolaš turismaealáhussii, muitalit Evergreen Capital -fitnodagas. Fitnodat lea vástidan hoteallafidnus jagi 2023 rájes, go gáddelávva nannejuvvui.
– Mii hálidat doaibmat ovdavázzin bistevaš ovddideamis ja hukset ovdamearkka Lappi turismii, maid doaivvu miel earátge dasto čuvvot, dadjá beaivválaš jođiheaddji Elias Pikkujämsä.
Dárkilut huksenplánat fitnodagas eai goittotge leat vel čájehit. Pikkujämsä goittot dadjá dan veardde, ahte sii hálidit minimeret birasváikkuhusaid ja maiddái kompenseret daid.
– Jurddan lea bargat ovttas báikkálaš servošiiguin ja dahkat mearkkašahtti investeremiid ovdamearkka dihte vuvddiid suodjaleapmái ja bistevaš turismma ovddideaddji skuvlemiidda, logahallá Pikkujämsä.
Fidnu birra lea gevvojuvvon garra digaštallan, ja máŋgasiid mielas hotealla ii galgga hukset luonddudilát Naŋŋánjárgga geahčai. Báikái doalvu sáttoluodda, muđui doppe ii leat gárvves infrastruktuvra. Guovllus leat goittot barttat, gos ásset sihke báikkálaččat ja bartalaččat.
Báikkálaččat fuolas hotealla huksema váikkuhusain
Anárlaš álbmotlihkadus Kestävä Kaavoitus Inari ja Suoma Sámi nuorat -searvvi ovddasteaddjit leat sádden rabas reivve Jasper Pääkkösii ja eará hoteallafidnu doaibmiide sosiála media bokte. Reivve leaba vuolláičállán Sunna Nousuniemi Kestävä Kaavoitus Inari -lihkadusas ja Jaakko Toikka SSN:n.
Reivves sii buktet ovdan fuola váikkuhusain, maid ođđa hotealla dagahivčče. Naŋŋánjárga lea ovdamearkka dihte dehálaš guohtunguovlu, gos bohccot ožžot lea ráfis. Avvila bálggus vuostálastá hoteallafidnu, muitala bálgosa boazoisit Niko Kustula Yle Sápmái.
Vuolláičállit healideaba muittuhit, ahte vaikko ovtta hotealla huksen Anárjávrri gáddái sáhttá orrut unna ášši, de das leat stuorra váikkuhusat. Nousuniemi mielas servodat galggašii ságastallat das, gokko mannet turismma rájit.
– Báikkálaš olbmot leamaš fuolas das, ahte man láhkai turisma viidu dáppe. Reivviin mii hálidit bohciidahttit servodatlaš ságastallama das, ahte makkár rámmaid mii dárbbašit turismii, muitala Nousuniemi.
Reivves čujuhit Sápmelaččaid duohtavuohta- ja soabadankomišuvnna raportii, mas ávžžuhuvvo dorvvastit sámi boazodoalu ja suodjalit sámeguovllu boares vuvddiid.
– Dát lea okta oassi stuorát ollisvuođa, ahte Sámis čuhppet vuvddiid ja huksejit jávregáttiide. Mii háliidat buktit ovdan gažaldaga, ahte leago riekta luonddudilát vuovddi njeaidit ja hukset hotealla, muitala SSN ságadoalli Toikka.
Pääkkösä dadjá iežas rolla fidnus unnon
Suopmelaš neavttár Jasper Pääkkönen ja investerenfitnodat Korpi Capital álggahedje muhtin jahki dassái hoteallafidnu plánema Naŋŋánjárgii, Anárjávrri gáddái.
Pääkkönen lea vástidan Yle Sápmái, ahte su rolla hoteallafidnus lea unnon das, mii dat álggos lei. Gávperegisttara dieđuid mielde Pääkkösis lea badjel 40 proseantta oamastus Arctic Destinations -fitnodagas, muhto Pikkujämsä nanne Pääkkösa vástádusa.
– Pääkkönen lea fidnu álggaheaddji, muhto láva nannema maŋŋá hoteallafidnus lea vástidan Evergreen Capitol -fitnodat ja Pääkkönen lea báhcán duogábeallái.
Reivve leat ožžon maid Anára gieldda politihkkarat ja gieldda virgeolbmot. Gielddaráđđehusa ságadoalli Janne Tervahauta dadjá áddet olbmuid fuola.
– Dathan lea lunddolaš, ahte ášši ságastahttá. Gielddas goittotge ii leat šat dadjamuš áššái, go lávva lea jo dohkkehuvvon. Dál gielddas dušše vurdet, ahte hoteallafidnu ollašuvva.
Pikkujämsä muitala, ahte hotealla válbmaneames ii leat vel dárkilut diehtu. Dál leat jođus plánen- ja válmmaštallanbarggut.
Fanashámmana hálddašeapmi sirdasii ođđa fitnodahkii
Mannan čavčča Naŋŋánjárgga fanashámmana hálddašeapmi sirdasii Arctic Destinations -nammasaš fitnodahkii, man oamasteaddjit leat Pääkkönen, Pikkujämsä ja Mikko Silventola. Áššis muitalii Lapin Kansa -aviisa golggotmánus 2025.
Arctic Destinations -fitnodat lea vuođđuduvvon Naŋŋánjárgga hoteallafidnu várás, man bokte Evergreen Capitol, Pääkkönen ja Silventola ovttas ovddidit hotealla huksema.
Silventola leamaš maid plánemin luksushotealla Juvdujohgáddái. Lapin Kansa -aviisa muitalii čakčamánus 2023, ahte Anára asttuáiggeássi ja investerejeaddji Mikko Silventola lei oastán gielddas vihtta tomtta Juvddujoga gáttis Inari Arctic Resort -fitnodaga namas.
Lávas leat meroštallan, makkár visttiid oažžu hukset
Naŋŋánjárgga gáddelávas leat meroštallan, maid tomtii oažžu hukset ja mo. Visttit ožžot leat eanemustá guovttigeardásaččat ja dat galget heivet vuovdelágan birrasii. Lávva vuođđuduvvá luonddu, geologaláš ja arkeologolaš čielggademiide, gáddesuodjalanprográmmii ja Natura 2000-fierpmádahkii.
Anár gieldda váldostivrra mearridii dohkkehit gáddeláva jagis 2021. Gáddelávas bohte golbma váidaga, muhto Davvi-Suoma hálddahusriekti ja alimus hálddahusriekti gomihedje buot váidagiid.
Rievdaduvvon 8.5.2026 diibmu 9.44: Lasihuvvon diehtu, ahte Naŋŋánjárggas leat barttat, main ásset olbmot.
