Sámediggeláhka manai čađa riikkabeivviin. Riikkabeivviid dievasčoahkkin dohkkehii sámediggelága jienaiguin 150–27. Eret ledje 22 riikkabeaiáirasa.
Suoma Sámedikki ságadoalli Pirita Näkkäläjärvi lea ilus go láhkaođastus manai viimmat čađa.
– Áibbas jáhkkemeahttun dovdu, 150 jiena beales. Dat lea áibbas mielahis lohku go leat 200 riikkabeaiáirasa. Dát leamašan guhkes bálggis sámi álbmogis ja sámi servošis dása, gal lea buorre dovdu, Näkkäläjärvi illuda.
Maiddái Sámedikki nubbi várreságadoalli Tuomas Aslak Juuso lea buriin mielain jienastusbohtosis.
– Hui buorre dovdu ja nu viiddis doarjja bođii iešguđet bellodagain, lohká Juuso.
Vuosttas várreságadoalli Leo Aikio lea maiddái duđavaš.
– Dál dát bargu lea ollen mollii ja mii beassat bargat eará dehálaš áššiiguin ja maiddái veháš illuditge viimmat, čaimmiha Aikio.
Sámedikki ságadoallijoavku ja eará ovddasteaddjit ledje báikki alde čuovvumin jienasteami.
Stáhtaministtar Petteri Orpo lohká leat duđavaš go ráđđehusprográmmii girjejuvvon láhkaođastus manai čađa.
– Dát leamašan jahkelogiid ođastusbargu ja mu mielas riikkabeivviid gieđahallamis láhkaevttohus nuppástuvai buorre guvlui. Sávan ahte dát buktá bargo- ja eallinráfi.
Oahpahusministtar Anders Adlercreutz (RÁB) lea ilus go láhka manai čađa. Sámediggeláhkaođastus leamašan dehálaš RÁB:ii.
– Dát lea njealját ráđđehusbadji mii geahččala fidnet ođastusa čađa. Ášši leamašan stuorra olmmošvuoigatvuohtagažaldat Supmii.
Sámediggeáirras Kari Kyrö smiehtada, maid son dás duohko áigu. Kyrö ii leat guottihan sámediggelága ođastusa ráđđehusa evttohusa mielde.
– Dáthan lei árvideamis dát boađus giđa ságastallamiid vuođul. Dál ferte vehá bosihit, Kyrö lohká.
Buot Lappi riikkabeaiáirasat jienastedje láhkaevttohusa vuostá, earret vuođđosuopmelaččaid Kaisa Juuso, guhte lei eret jienasteamis. Juuso jienastii láhkaevttohusa vuosttas gieđahallamis lága beales.
Guovddášbellodaga riikkabeaiáirasat Hannu Hoskonen ja Petri Honkonen evttoheigga lága hilguma maŋŋebárgga 17.6.
Vel ii leat áibbas dárkilis diehtu goas ođđa láhka boahtá fápmui. Presideanta mearrida lága fápmuiboahtimis dalle go vuolláičállá lága.
Riekteministeriija láhkaráđđi Yrsa Nyman árvala, ahte ođđa sámediggeláhka sáhtášii boahtit fápmui jo borgemánus álggus. Su dieđuid mielde presideanta Alexander Stubb vuolláičállá lága áramustá 27.6. dahje 4.7.
