Vuossárgga rievdá máŋgga nuora eallin goit jahkebeallái. 7.7. Suomas jagi nubbi joavku álgá soahtevehkii, vuosttasat álggahedje bálvaleami soahteveagas ođđajagimánus.
Justa dát muddu geasis lea anárlaš boazodoalli Mihku Näkkäläjärvii hui dehálaš, muhto bálvalangeatnegasvuohta ii vuordde.
– Jus miessemearkumat maŋŋonit vahkuin, de lea munnje vehá heajos hommá, dadjá Näkkäläjärvi.
Vaikko soahtevehkii vuolgin gaskkalduhtášii Sállevári bálgosa boazonuora miessemearkumiid, lea son goit iluin vuolgimin dohko.
– Gal áhčči, viellja ja oabbá birgejit doppe, jáhkká Näkkäläjärvi.
Badjedási rájes lea háliidan Avvilii meahccesoalddáhin
Näkkäläjärvii leamašan badjedási rájes dehálaš, ahte beasašii soahtevehkii Sápmái, Avvila rádjejeagárkompaniijai. Báikkis lea dihto beaggin. Avvila Rádjejeagárkompaniija dovdet báikin gos ii leat álki, ja nuorra albmás gáibiduvvojit nana searat.
Avvila rádjejeagárkompaniijas skuvlejit meahccesoalddáhiid. Sin oahpahit johtit unna joavkun ja čoaggit dieđuid vašálaččain, ja daid dieđuid vuođul duššadit vašálaččaid doaibmannávccaid.
Dán rollii maiddái Näkkäläjärvi lea viggan álggu rájes.
– Jus in livčče beassan dohko, livččen duhtameahttun. Avvila soahteveagas leat guhkes meahccereaissut. Dat lei stuorámus sivva, manin lean dohko ohcalan, muitala Näkkäläjärvi.
Mihku Näkkäläjärvi áigu čađahit soahteveaga bealle jagis studeremiid ja bargguid dihte. Son lea jo smiehtadan iežas boahttevaš rolla soahteveagas.
– Lean smiehtadan sátnedoalvu hommá. Das beassá vuodjit gielkkáin ja njealjejuvllagiin. Mun jáhkán, ahte mun máhtán bures vuodjit, jus veardida earáide, árvalastá Näkkäläjärvi.
Sávvá beassat luomus fas boazobargguide
Loahpaloahpas Mihku Näkkäläjärvi gearggai moadde beaivvi leat miessemearkumiin, go Sálleváris mearkugohte mannan vahku beallemuttus.
Son ii bala, ahte návccahuvašii soahteveaga meahccereaissuin ja diehtá jo maid dahká, go beassá lupmui.
– Sihkkarit geahččalan oažžut luopmobeivviid, ahte beasan bigálusaide, dadjá Näkkäläjärvi.
Vuossárgga Avvil rádjejeagárkompaniijas álggahit 145 albmá soahteveaga. Suoidnemánus álggahan soalddáhat besset ruoktot juogo 18.12.2025 dahje 18.6.2026, jus válljejit bálvalit guhkit áigge.
