EU-parlameantta áirras Anna-Maja Henriksson (RÁB) mielas livčče buorre, jus sápmelaččain livčče fásta váikkuhanorgána Eurohpa uniovnna parlameanttas. Dát gáibida ovttasbarggu máŋgga iešguđet guovllus.
– Mii fertet parlameanttas iskat ovttas sápmelaččaiguin gávdnat dasa čovdosa. Ja dat gáibida máŋgga riikka ovttasbarggu, dát ii leat dušše Suoma stáhta ášši, oaivvilda Henriksson.
Son oaidná, ahte ná Eurohpa uniovnna áidna eamiálbmot váldojuvvošii buorebut vuhtii mearrádusaid dahkamis.
– Hálidan EU-parlamenttarihkkarin doalvut eambo dieđuid Eurohpa eamiálbmogis ja maid dat dárkkuha, sihke dan mo dálkkádatnuppástus sidjiide váikkuha. Ja muđuide ovddidit sápmelaččaid vuoigatvuođaid ja vejolašvuođa seailluhit giela ja kultuvrra, dadjá Henriksson.
Sámedikkis leat bargagoahtán EU-ulbmiliiguin
EU-áššiid ovddideapmi lea Sámedikki riikkaidgaskasaš politihka njunnošis dán válgabajis. Sámedikkis leat guhká bargan Ovttastuvvan našuvnnaiguin, ja ságadoalli Pirita Näkkäläjärvi oainnu mielde dál livččii buorre bargagoahtit beaktileappot maid EU guvlui.
Guhkesáiggi ulbmilin lea dat, ahte sámiin livččii virggálaš sajádat Eurohpa parlameantta mearrádusaid dahkamis ja politihkas. Sávaldahkan livččii, ahte EU:s livččii sámiin bargolatnja ja dohko livččii vejolaš sáddet bargi, guhte beasašii EU parlameanttaviesuide deaivat olbmuid ja čuovvut friija EU ságastallama ja politihka.
Sámediggi lea miessemánus deaivvadan EU doaibmaorgánaid ovddasteaddjiiguin. Deaivvadeami mihttomearrin lei bargogoahtit dán ovdii, ahte sámedikki ulbmilat EU:s šaddet duohtan.
Sámedikkit Suomas, Norggas ja Ruoŧas leat jo guhká buktán ovdan dan, ahte sápmelaččat galggašedje oažžut iežaset ovddastusa EU:i Brysselii. Henriksson jáhkká, ahte dat sáhtášii leat okta vejolašvuohta, muhto dat gáibida resurssaid.
– Hui miellagiddevaš jurdda. Ferte guorahallat ahte makkár vejolašvuođat dasa leat. Eará ášši lea dasto dat ahte gos gávdno ruhtadeapmi dasa, smiehtada Henriksson.
Anáris illudedje ođđa sámediggelágas
Anna-Maja Henriksson lea galledan Anáris dáid beivviid. Son lea deaivan Sámedikki ovddasteaddjiid ja ságastallan singuin EU-áššiid lassin maid sámediggeláhkaođastusas.
– Lean deaivan dáppe daid olbmuid, geain mii leat dáid jagiid áigge bargan ovttas. Ledjen vuosttas áigodaga vuoigatvuohtaministtarin go dat láhkabargu álggii.
Son lei lohpidan geassemánus, go láhkaevttohus dohkkehuvvui riikkabeivviin, ahte boahtá galledit Anárii ja illudit ovttas sápmelaččaiguin.
– Iihan máilbmi dása noga, muhto dál álggahit ođđa áigodaga. Dál sáhttit ovddidišgoahtit eará áššiid, árvalastá Henriksson.
