Säämi máttááttâskuávdáš (SMK) lii čokkim puoh toimâidis Aanaar markkânân. Majemužžân puásuituálu- sehe luándu já piirâs -suorgij uápuh sirduu Tuáivunjaargâst Anarân. Tondiet lii lase tárbu meid uáppei aassâmviistijd.
SMK uáppeeasâttâhân ađai Jeeran ceggânij asâttâhtáálu Jeera 2 ive 2013 já taan čoovčâ lekkui meid uđđâ Jeera 3. Tai mield ässeemeeri pajanij 77:n.
Jeerast lii faallâmnáál maaŋgâlágán puđâldâs rijjâääigi
Nube ive Jeerast ässee Justus Paadar, 17, rámmoo, mon ennuv Jeerast láá máhđulâšvuođah puđâldiđ škovlâpeeivij maŋa.
– Tääbbin lii hirmâd šiev ohtsâšvuoiŋâ já láá ennuv ääših rijjâäigin. Ovdâmerkkân muorâtalgooh, uccjuovlah já ereslágáneh juávhuh, tego elleekovejuávkku. Puáhtá meid kuálástiđ já leggistiđ tiká. Sávrumsalist lii meid piŋŋispevdi, Paadar luvâttâl.
Paadar muštâl, et sun uásálist masa puoh rijjâääigipuđâldâssáid, moh Jeerast láá fáállun.
– Muu mielâst tot lii hävski, ko uážžu uđđâ ustevijd, já tääbbin láá ulmuuh puoh soojijn tego Maadâ-Suomâst já meiddei aaibâs nuortâst.
Pivnohis riddosävni lieggân távjá
Ohtâ Jeera eromâšvuotâ lii 50-lovvoost huksejum muorâsävni Aanaar jäävri riddoost, mon uáppeeh jiejah tuálih paijeen.
Säämi máttááttâskuávdáá sajepalvâlemvästideijee Virpi Valle-Perätalo muštâl, et uáppeeh iä lah kiävttám asâttuv šleđgáin lieggâneijee sisâsäävni tast maŋa, ko riddosävni uđâsmui nelji ive tassaaš.
– Sij lieggiitteh, pargeh muorâpargoid já čorgejeh jieš säävni. Tot lii uáli pivnohis olgosävni, Valle-perätalo muštâl.
Asâttâh lii suullân kuulmâ kilomeetter keččin Aanaar markkânist. Valle-Perätalo lii räämist Jeera mučis pirrâsist.
– Ko lam Maadâ-Suomâ asâttâhulmuiguin teivâm, te lam räämist tast, et kal mist lii puoh muččâdumos päikki.
Valle-Perätalo mield lii váldukodálávt härvinâš, et uáppeid lii faallâmnáál návt uđđâáigásiih sajeh já valjeest oovtâ ulmuu visteh.
– Mist láá kuittâg hiivsigeh já rišoh viistijn. Mij meid iskâp tiälláđ toho lasâlijnijd já tiegárijd. Uáppeeh láá tiäđust-uv meiddei uážžum tuáivuđ, et maid halijdeh porgâđ Jeerast škovlâive ääigi.
