Vearrohálddahus lea otne almmustahttán mannan jagi vearrodieđuid. Yle Sápmi lea čohkken dán artihkkalii sámi organisašuvnnaid ja gielddaid njunnožiid sihke eará bures dinen sámeguovllu olbmuid dienasdieđuid.
Mátkeealáhusain dine buoremusat
Sámeguovllu dienasdronnet lea anárlaš fitnodatdoalli Mari Lappalainen, su dienas mannan jagi lei 500 644 euro. Iiba su isitge guhkás báze, Jouko Lappalainen dinii diibmá 487 399 euro. Lappalainen báras lea Wilderness Hotels-fitnodat, mas leat hotellat Anára márkanis, Njellimis ja Suoločielggis.
Maiddái Markku Inkilä lea riggon turismafitnodagain. Su dienas mannan jagi lei 200 681 euro. Inkilä lea Mari Lappalainen viellja. Inkilä fitnodat fállá Suoločielggis ijastallamiid turisttaide glássaigluin.
Avvilaš fitnodatdoalli Marko Tervaniemiges dinii diibmá 175 520 euro. Son oamastii ovdamearkan Hotelli Kultahippu, man son vuvddii dán jagi bealde eret.
Ohcejohkalaš boazodoalli Johan Erik Valle lea dinen mannan jagi 127 250 euro. Sus lea fitnodat mii fállá boazosafariid turisttaide.
Sámiorganisašuvnnain buoremusat dinii SOG rektor
Sámi oahpahusguovddáža rektor Eeva-Liisa Rasmus-Moilanen dienas lei mannan jagi 82 468 euro. Govva: Vesa Toppari / Yle
Maiddái Ahti Nordberg bargá Roavvenjárggas ja su dienas lei 159 008 euro.
Miikka Niittyvuopio fas bargá Oulus ja su dienas lei 152 323 euro.
Dáidagiinge sáhttá dinet bures
Dáiddár Outi Pieski dienas lei mannan jagi 191 929 euro. Su dáidda leamaš bivnnut ja Pieskis leamašange olu čájáhusat miehtá Eurohpa. Govva: Kirsi Crowley / Yle
Buohkaid buohta ii kultursuorggi bargu goittot časke láibái, goittot jus geahččá vearrodieđuid. Filbmabagadalli ja girječálli Suvi West dienas lei mannan jagi 10 811 euro. Musihkkar Aslak-Nils (Ailu) Valle fas dinii 4 371 euro. Vearrodieđut eai goit muital olles duohtavuođa, danne go buot veahkeruđain ii dárbbaš máksit vearu.
Maŋŋebárgga sáhte máŋgasat ruvvestit čalmmiid go skuvlaguovddáža buohta ledje rekčon biillat ja roasmmohuvvan olbmot, muhto dat lei lihkus dušše hárjehus.
