Lappi buresveadjinguovlu šadda seastit miljovnnaid ja easkka dál leat bastán muitalit vuosttas, čielga loguid das, man olu dihto bálvalusaid heaittiheapmi ja geahppedeapmi buktá seasttuid.
Lappi buresveadjinguovllu ráđđehusa evttohusat bálvalanfierpmádaga nuppástusain dahkkojuvvojedje sullii mánnu dassái. Evttohusat bokte dalán garra vuostálastima. Evttohusa mielde Avvilis nogašii doavttirgohcin ihkku ja maiddái seaŋgaossodaga seaŋgasajiid háliidit geahpedit. Dasa lassin evttohusa mielde heaittihuvvošii Muoná seaŋgaossodat.
Rehkegiid mielde ovdamearkka dihte seaŋgaossodagaid heaittihemiin seasttášedje 7–9 miljovnna euro jagi 2028 rájes.
Avvila seastologu ferte vuordit vel
Lappi buresveadjinguovllu guovlluráđđehusa ságadoalli Timo Peisa muitala, ahte sis ii leat vel diehtu das, man olu seasttášedje Avvila gohcinbálvalusa heaittiheamiin.
Peisa árvala, ahte seastosubmi čielgá lagaš beivviid.
– Ášši válmmaštallet dál intensiiva guorahallama mielde, dadjá Peisa.
Buresveadjinguovllu stivra fidnii daid vuosttaš rehkenasttimiid nuppástusevttohusaid seasttuin njuni ovdii easkka dán vahku vuossárgga.
Buresveadjinguovllus vurdet vel gielddaid cealkámušaid dán vahku loahpa rádjai.
Sámis olu cealkámušat
Máŋggat gielddat ja Sámediggi leat buktán oainnuideaset daid evttohusaid birra ovdan.
Anára gielddahoavda oaidná Avvila birrajándora doavttergohcima heaittihanplánain vára báikkálaččaid dorvvolašvuhtii.
Gielddahoavda Tommi Kasurinen muittuha, ahte Avvilis lea ovdamearkka dihte viiddis fievro- ja juvlatestemat, maid oktavuođas sáhttet geavvat bárttit.
– Áššehasat vurdet, ahte dearvvasvuođabálvalusat leat ortnegis, jus bárttit gevvet.
Dasa lassin Kasurinen namuha rádjegozáhusa ja polesa doaimma Avvilis, go seastinplánat váikkuhit maiddái daid doibmii.
Anára gielda vuostálastá evttohusa heaittihit Avvila birrajándora doavttergohcima ja evttohusa geahpedit Avvila seaŋgaossodaga báikemeari. Gielda muittuha vuoigatvuođas oažžut bálvalusa sámegielain, Avvila doavttergohcima telefonrávvemis ja ambulánsavuojuid lassáneamis sihke táksiid vátnivuođas.
Ohcejoga gielda attii cealkámuša oalle jođánit. Gielda vuostálastá Lappi buresveadjinguovllu evttohusa eandalit Avvila birrajándora gohcima heaittiheami oasil. Gieldalaččat leat fuolas buohkanassii duhát kilomehtera vuodjinmohkis, jus gárttašii vuolgit Njuorggámis Roavvenjárgii hohppos doavttervuostáiváldimii virgeáiggi olggobealde.
Dasa lassin gielda doarjjasta sápmelaččaid gielalaš ja kultuvrralaš rivttiide, mat eai boađášii buresveadjinguovllu evttohusas ollašuvvat.
Muoná gieldage vuostálastá iežas cealkámušas Muoná seaŋgaossodaga heaittiheami ja muhtun gohcinbálvalusaid gáržžideami. Muoná gieldda dieđáhusas buktet ovdan govttohis guhkes mátkki, mii šattašii Eanodaga Gilbbesjávrris lagamus seaŋgaossodahkii. Muoná gielda bivdá Lappi buresveadjinguovllu váldit vuhtii eandalit dan, ahte Muoná seaŋgaossodahkii ja buresveadjinguovddážii leat nagodan hukset bálvalusaid maiddái davvisámegillii.
Maiddái Soađegili gielda vuostálastá rievdadusevttohusaid ja gáibida, ahte hohpolaš doavttervuostáváldin galggašii leat rabas ainjuo eahket guđa rádjai.
Sámediggi lea váldán áššái beali ovttas gielddaiguin
Sámediggi ovttas Eanodaga, Anára, Muoná ja Ohcejoga gielddaiguin leat maid ovttas čállán bealiváldima, mas bivde Lappi buresveadjinguovllu váldit vuhtii pasientadorvvolašvuođa ja ovttaveardásašvuođa. Sámediggi maiddái deattuha oktasaš ráđđádallamiid mearkkašumi ja oaidná, ahte ráđđádallamat livčče galgan dollojuvvot jo ovdal evttohusa dahkama.
Lappi buresveadjinguovllu doaibmasuorggijođiheaddji Miia Palo muitala, ahte Sámedikkiin galget ráđđádallat áššis boahtte vahku maŋŋebargga.
Máhcahagaid gieđahallet guovloráđđehusa čoahkkimis juovlamánu vuosttas beaivve. Dábálaš olbmot sáhttet maiddái sáddet kommeantta seastinplánain buresveadjinguovllu neahttasiiddus. Palo muitala, ahte Lappi buresveadjinguovllus váldet máhcahagaid vuhtii ja dahket ovdaváikkuhusaid árvvoštallama, mas guorahállet maiddái váikkuhusaid guovloekonomiijai.
Lappi buresveadjinguovllu guovlostivra mearrida bálvalusnuppástusain juovlamánu 8. beaivve.
