Gáregasnjárgga kapellii hálidit ođđa girkotekstiillaid. Searvegoddi lei ordnen deaivvadeami guovllu duojáriidda, gos plánejedje makkár tekstiillaid galggašii duddjot.
Kapealla áltár goittot dárbbašivčče ođđa biktasa ja girkohearráge ođđa stoolaid. Girkohearrá Anu Sorjonen jáhkká, ahte báikkálaš duojárat gal máhttet heivehit iežaset duodjeárbevieru girkotekstiillaide.
– Dieđusge duodjemáhtu boahtá dáid duojáriin. Sii dihtet mii gullá dán guovllu duodjeárbevirrui ja makkár jurdagiid sáhttá heivehit girkotekstiillaide. Girkotekstiillain oidno girkolaš symbolihkka ja liturgálaš ivnnit, muhto daidda sáhttá ovttastahttit sámeduoji ja fáttáid birastahtti luonddus.
Kapellii ledje maŋŋebárgga boahtán logemat olbmo ságastallat ja smiehttat makkár girkotekstiillat dohko heivejit.
Marja-Liisa Laiti ja Rauna Harlin leaba duddjon máŋgalot jagi ja sudnos šadde jo jurdagat vuosttas deaivvadeamis.
– Na dieđusge dakkár oktageardán muhto čáppa, árvalastá Laiti.
– Leahan dat dieđusge somá, ahte mii beasašeimmet ieža daid smiehttat ja hutkat makkára mii hálidat, mii vehá muittuhivčče dán min guovllu. Ja min guovluhan lea duoddarat ja Deatnu, dadjá fas Harlin.
Kapealla hálidit ávvudit ođđa tekstiillaiguin
Girkohearrá Anu Sorjonen sávvá, ahte girkotekstiillat válbmanivčče ovdal jagi loahpa. Kapealla deavdá dán jagi 10 jagi.
– Livččehan dat somá oažžut daid jo dán jagi bealde. Go kapealla deavdá logi jagi, de dainna lágiinge livčče buorre ávvudit dán 10-jahkásaš kapealla.
Searvegoddi lea ovddit girkohearrá Päivi Aikasalo áigge duddjon ođđa girkotekstiillaid Ohcejoga girkui. Dalle ohcejohkalaččat movttiidedje ovttas duddjot vuos Sámi oahpahusguovddáža girkotekstiillaid duddjonkurssas ja kurssa maŋŋá vel searvegotti goarrunrieggás.
Girku tekstiillain oidnojit sámi ivnnit. Ja maiddái geavatlašvuohta, ovdamearkan girkobeaŋkkaide duddjujedje dipma guottáid, maid alde lea vuogas čohkohallat vaikko olgun livčče buolašge.
