Gávperáhkkanus buollái lávvardateahkeda Njávdámis. Lappi gádjunlágádus lei čáskkadeamin buollima báikki alde ja esttii dan leavvamis eará ráhkkanusaide olles lávvardatija.
Njávdáma Nord1-Market nubbi gávpejas Juha Kekäle lohká Ylei, ahte ii nákce vuos kommenteret buollima.
– Šohkka lea ain garas, dadjá son.
Čáskkadanbargguin gerge sotnabeaivve čieža áigge iđđes ja gádjunovttadagat vulge báikkis. Čáskkadanbargguide serve ovttadagat maid Girkonjárggas, Norgga bealde. Goaivunmášen lea sotnabeaivve bolton eatnama, amas dolla buollát ođđasis.
Buollimis eai leat šaddan olmmošvahágat, dieđihedje gádjunlágádusas.
Gádjunlágádus oaččui dieđu stuorra ráhkkanusbuollimis lávvardaga diibmu 19.25.
Gávpi duššai oalát
Gávpejas Juha Kekäle muitalii Iltalehti-áviisii eahkes buollima áigge, ahte gávppis visot leat buollán. Gávpejas árvala, ahte vahágat dán buollimis šaddet miljovnnaid euroid ovddas. Dušše beare buktagat ledje 800 000 euro ovddas.
Gádjunlágádus ja Lappi boles čielggadit buollinsiva ovttas. Ulbmilin lea čielggadit, gokko buollin álggii ja mo dat leavai.
– Dutkamii manná máŋga beaivvi. Dutkamin leat bolesa teknihkalaš báikkedutkamuša joavku ja gádjunlágádusa buollinsivaid dutkanjoavku, dadjá rihkuskommisára Jouni Koivunen.
Dáhpáhusas eai goit navdde rihkkosa.
Báikkálaččat hirpmástuvvan
Njávdáma gávperáhkkanusa buollin lea hirpmástuhttan báikkálaččaid. Nord1-Marketa guoras, dušše 15 mehtera geažes lea K-Market. K-Market gávpejas Juha-Matti Liasis illá gávdnojit sánit.
– Dat lea gal issoras dáhpáhus. Ii das nagot jurddašit vel maidige, dadjá Lias.
Lias ollii báikki ala sulli 45 minuhta ovdal vuosttas gádjunovttadagaid, mat bohte Girkonjárggas. Son jáhkká, ahte su gávppi gájui dálki. Njávdámis lei oalle goalki lávvardateahkeda.
– Ii das lean eará barganláhkai, go suddjet birrasa.
Juha-Matti Liasa jurdagat leat dál buollán ránnjágávppi gávpejasaid luhte.
– Dat lea stuorra manahus, son šuohkiha.
