Lappi gearretriekti lea maŋŋebárgga álggahan Báišduoddara viiddis boazosuoládeami ášši gieđahallama Anára gielddadálus, Avvilis.
Golbma báikkálaš boazodoalli leat áššáskuhtton badjel 50 bohcco suoládeamis Ohcejogas. Dagut dáhpáhuvve giđđat 2020.
Oktiibuot golmma dievddu sivahit roavva suoládeamis ja roavva vearisteamis.
Bolesa mielde dievddut leat ovdadutkamis mieđihan oasi daguin. Dikkis sii goit šiitet, ahte livčče sivalaččat roavva suolavuhtii dahje roavva vearisteapmái. Sii maid šiitet, ahte leat doaibman ovttas.
Báišduoddara bálgosis gávdne jagis 2020 gárddástallamiid oktavuođas bohccuid, maid mearkkat ledje rievdaduvvon. Boles dutkagođii boazosuoládemiid Báišduoddara bálgosis seamma giđa. Dalle Lappi boles dieđihii, ahte sii dutket roavva boazosuolavuođa ja vearistanrihkkosa Báišduoddara bálgosis.
Alaguoddi mielde golbma dievddu, geat leat dál áššáskuhtton, leat juogo ovttas dahje okto suoládan máŋggaid logiid bohccuid nu, ahte leat rievdadan daid mearkkaid. Lassin bohccuid málejuvvon guolgamearkkaid leat rievdan vástidit áššáskuhtton olbmo guolgamearkkaid ja bohccuide leat bidjan iežaset bilttáid.
Okta áššáskuhtton dievdu čuoččuha, ahte muhtin eará lea merken bohccuid su merkii, go sus ledje árat suoládan bilttáid. Seamma dievdu lohká, ahte su bohccuid ledje árat suoládan.
Suoláduvvon bohccuid árvu sullii 25 000 euro
Alaguoddi árvvoštallá, ahte bohccuid árvu leamašan unnimustá sullii 25 000 euro. Alaguoddi gáibida, ahte dahku dubmejuvvo roavva suolavuohtan, go dat lea alaguoddi mielas viiddis, dáhpáhuvvan dávjá ja lea váikkuhan muhtima ealáhussii. Alaguoddi Emilia Välimaa gáibida áššeoasálaččaide evttolaš fáŋgavuođa.
Báišduoddara bálggus searvá alaguoddi gáibádusaide. Bálggus gáibida buhtadusaid bohccuin, maid leat galgán njuovvat dahje goddit dagu dihte. Sivvan lea, ahte jus gárdái boahtá boazu man mearkka eai dovdda, dan galget njuovvat.
Dán gearretrievtti gieđahallamis leat máŋggat logit áššeoamasteaddji. Oassi bohccuin gulle norgalaš orohagaide ja áššeoamasteaddjin leat maiddái Norga beal boazodoallit.
Oassi áššeoamasteaddjiin lea soabadan áššeoasálaččaiguin eaige šat gáibit buhttadusaid bohccuin.
Alaguoddi: Sávvamis das lea ovdal eastadeaddji váikkuhus
Alaguoddi mielde gažaldagas lea áidnalunddot ollisvuohta: maŋimuš jagiid áigge ii leat áššáskuhtton seammasullasaš sivahusain.
– Boazosuolademiin ja muđuige bohccuide guoski rihkkosiin duođaštusaid skáhppon lea hui hástaleaddji, muhto dán dáhpáhusas leat oaidnán, ahte duođaštusat leat doarvái áššáskuhttimii, dadjá Emilia Välimaa.
Alaguoddi sávvá, ahte dán áššis livččii ovdal eastadeaddji váikkuhus.
– Olbmuide šattašii ipmárdus das, ahte dáidge áššiid dutkat ja dain maiddái áššáskuhttojuvvojit, dalle go áššis leat doarvái čájáhusat nappo duođástušat.
– Dákkár áššit eai báze seavdnjatvuhtii, baicce dat dutkojuvvojit. Kánske dat eastada dákkáriid dáhpáhuvvamis boahtteáiggis.
Okta bealuštanášševuoddjiin Jaakko Kuparinen lea sierra oaivilis alaguoddin das, ahte gažaldagas livččii roava suoladeapmi.
– Mu oaivealmmái lea dán áššis gávnnahan, ahte lea ovttaoaivilis (su:riidatonta) dušše suoládanrihkkosa vuođđohámis ja dan maid dušše suoládeami geahččaleami dásis. Dan lassin mu oaivealmmái lea šiitán vearistansivahusa, muitala Kuparinen.
Áššeoasálaččaid bealuštusa oainnu mielde rihkkosiid duohtan čájeheapmi ii oro dáhkideaddji, go áššáskuhttima vuođđun lea eanáš mearkadutkamuš.
Kuparinen čuoččuhii gearretrievttis, ahte ášši dutkamis ii leat leamašan makkárge operatiivalaš plána ja bohccuid leat goddán ákkaid haga.
– Sáhka ii leat oba bolesa jođihan dutkamis, dajai son.
Ášši gieđahallet Lappi gearretrievttis guovtti vahku áigge oktiibuot čieža beaivvi.
Divvojuvvon 22.04.2026 diibmu 12.04: Lappi gearretriekti lea álggahan ášši gieđahallama maŋŋebárgga, ii vuossárgga nu mo álggos čaliimet.
