Puátteevuođâst ij lah innig anarâšâi kirkkopase. Aanaar servikodderääđi lii kieskâd meridâm, et sij iä ornii innig sierâ anarâšâi kirkkopase, pic almolii sämmilij kirkkopase.
Anarâšâi kirkkopase ij lah uárnejum muádi ihán já Anarâšah-servi ličij halijdâm iäláskittiđ tábáhtus taan keesi. Anarâšah-servi lii oovtâst Aanaar servikuddijn ornim tábáhtus ive 2013 rääjist Aanaar kirhoost. Anarâšâi kirkkopase saajeest lii jo muáddi ive uárnejum almolâš sämmilij kirkkopase.
Anarâšah-seervi saavâjođetteijee Anu Avaskari mield ulmuuh láá hiämástum já pettâšum miärádâsân. Tábáhtus lii suu mield kiäsuttâm ennuv ulmuid.
– Mist láá taah puoh sämmiláid uáivildum tilálâšvuođah ennuv. Taat lâi kuittâg taggaar mii jieččân, mon ulmuuh láá uáinám taarbâšlâžžân, eromâšávt aheulmuuh.
Anarâšâi kirkkopase lii uárnejum táválávt keessiv já tábáhtus kunnijât tovláá ärbivyevi. Tovle Anarist uárnejii kesimarkkânijd já tai ohtâvuođâst kesikirho, kuus ulmuuh čokkânii pirrâ Aanaar.
Anarâšâi kirkkopase Immeelpalvâlus lii lamaš anarâš- já suomâkielân.
Aanaar servikode kirkkohiärrá já servikodderääđi saavâjođetteijee Tuomo Huusko muštâl, ete äšši lii lamaš vaigâd.
– Tääl mij lep uáinám, et pyeremus vyehi juátkiđ ovdâskulij lii tot, ete ep ornii innig kirkkopase tiätu sämmilij juávhu noomâst pic ličij taggaar almolâš sämmilij kirkkopase, kuus puoh sämmiliih láá tiervâpuáttim já kullojeh puoh sämikielah.
Servikodde ij haalijd väldiđ sämipolitiklávt pele
Tuomo Huusko muštâl, ete tábáhtus noomâ anarâšâi kirkkopase lijjii uáinám nuuvt, et servikodde ličij váldám sämipolitiklávt pele áášán.
Anu Avaskari imâštâl maht puohháid ávus tábáhtus ličij mahtnii poolitlâš.
– Kost talle puáhtá ohtii ivveest orniđ anarâškielâg anarâšâi kirkkopase, jis ij Anarist?, Avaskari imâštâl.
Miärádâsâst ij lah val puáttám macâttâs Aanaar servikodderááđán. Huusko muštâl, et miärádâs tohâmist lijjii meid anarâšah fáárust.
– Miärádâs ij meerhâš tom, et mij ep halijdiččii leđe tuárjumin anarâšâid já puoh eres-uv sämijuávhuid, iätá Huusko.
Anarâšah-seervist láá smiettâm, et uárnejeh-uv monniilágán nube tábáhtus anarâššáid keesi ääigi. Anarâšâi kirkkopase ornim lâi áinoo vuávájum tábáhtus seervi toimâvuáváámist.
– Kale muu mielâst servikodderääđi já meid kirkkorääđi puávtáččij smiettâđ taan uđđâsist, iätá Anu Avaskari.
