Mihcamárvahkus ealáska Ohcejoga girkosiida duođas, go Sámiráđđi ordne doppe iešguđetlágan dáhpáhusaid. Doppe dollet ovdamearkka dihte nuoraidkonferánssa Gávnnadeapmi 3, KulturSápmi 2026 ja vel 23. Sámekonferánssa.
Ohcejoga gielddahoavda Päivi Kontio smuhččá, go oktiige Ohcejogas ordnejit stuorra dáhpáhusaid.
– Issoras fiinna ášši. Moadde jagi dassái, go vuosttas geardde válde oktavuođa, ledjen áibbas ilus. Gildii lea issoras dehálaš, ahte deike bohtet ordnet stuorra dáhpáhusaid, mojohallá Kontio.
Dálá dilis Ohcejoga girkosiidda birrasis leat sullii 350 seaŋgabáikki, muitala Kontio ja joatká, ahte gielddas eai bastte issoras stuorra festiválaid dahje dáhpáhusaid ordnet dan dihte.
Kontio sávvá Sámiráđi dáhpáhusa čuollat bálgá, nu ahte earáge dáhpáhusaid ordnešedje Ohcejogas.
– Lea eanet go buresboahtán, ahte deike bohtet ordnet dáhpáhusaid.
Nuoraidkonferánsa geasuhii nu, ahte báikkit divve dalán
Gávnnadeapmi 3 -dáhpáhussii ledje 35 báikki nuoraide. Dat báikkit bohte Youth Together for Arctic Futures -prošeavttas, go Gávnnadeapmi 3 -dáhpáhus lea oassin dan.
Sámiráđi EU-áššedovdi, nuoraidkoordináhtor Janne Hirvasvuopio lea duđavaš. Nuoraidkonferánsa Gávnnadeapmi 3 lei nu bivnnut, ahte dasa várrejuvvon oasseváldiid báikkit divve dakkaviđe.
– Mis sáhttá leat dakkár dilli, ahte gártat dahkat mearrádusaid das, mo sihkkarastit, ahte Sámi viidodaga ja sohkabeliid dásseárvu ollašuvvá, smiehtada Hirvasvuopio.
Gávnnadeapmi 3 ordnejuvvo 15.-18.6. Dat lea 18–35-jahkásaš nuoraide oaivvilduvvon konferánsa, mii sisttisdoallá bargobájiid ja kulturprográmma.
Konferánssa váldoulbmilin lea ovttasbargat nuoraid cealkámušain, gos oassálastit besset meroštallat mat leat buot deháleamos hástalusat ja čovdosat Sámi nuoraide, čilge Hirvasvuopio.
Buohkanassii vurdet badjel 200 olbmo Ohcejohkii
Sámiráđi kulturossodaga buvttadeaddji Petra Laiti ii sáhte vel diehtit dárkilit, man olu oasseváldit bohtet Ohcejohkii mihcamárvahkus. Oassálastiid mearri maiddái juohkása sierra beivviide, muitala Laiti.
– Mu árvidan, ahte jus rehkenasttán oktii buot olbmuid, geat oassálastet masa beare prográmmii dien vahkus, de mii leat gosnu 200-250 gaskkas, muhto lea vel váttis dadjat dárkilut loguid, árvala Laiti.
KulturSápmái dieđiheapmi lea ain rabas. Konferánsadelegašuvnnaid dieđihanmearri čielga easkka miessemánu bealde, čilge Laiti.
Ohcejogas iežas hástalusa buktet idjadansajit, muhto dasa leat čovdosat.
– Oasseváldiide lea dieđihuvvon, ahte jus háliida min bokte oažžut idjadeami, dalle soaitá gártat juohkit lanja geainnanu, go buohkain ii leat vejolašvuohta oažžut priváhtalanjaid.
Nuoraidkonferánssa lassin Ohcejogas lea KulturSápmi-dáhpáhus 16.–18.6. Dat lea jahkásaš deaivvadanbáiki sámi dáidda- ja kultursuorggi doibmiide. Dasa sáhttá dál almmuhit iežas fárrui.
Sámiráđi 70-jahkásaš bálggis ávvuduvvo 23. Sámekonferánsas Ohcejogas mihcamárvahku loahpas, 18.-21.6.2026. Sámekonferánsa lea Sámiráđi alimus orgána ja Sámiráđi deháleamos forum, ja mearrádusaid mielde galgá dat lágiduvvot juohke njealját jagi.
Ohcejogas ordnejuvvo dieid dáhpáhusaid lassin velá duojáriid ja sámi fitnodagaid deaivvadeapmi 16.-28.6. ja duodjemárkanat Ohcejohkii 17.–19.6.2026.
Mihcamárain ordnejuvvo maiddái guovllu iežas, Ohcejohka šearrá -dáhpáhus.
