Jovnna sátnegihppu -ráiddus Yle Sámi doaimmaheaddji Jouni Aikio,Luobbal-Jovsset Jovnna suokkardallá dan háve, gosa bidjat-vearbba heive bidjat ja gosa fas ii.
Bidjat-sáni sáhttá bidjalit measta gosa fal. Sáhttá biktasiid bidjat vuos ala, de bidjat borramuša beavdái ja maŋŋel vel smiehtadit, ahte gosabat mun bidjen dan čoavdaga. Ja de vel muitit bidjat reaŋgga bargui.
Sáni gullá oalle olu, muhto álot dan ii dárbbaš. Dávjá olbmot dadjet, ahte mun bijan uvssa gitta dahje bijan dola. Muhto ášši sáhttá gal muitalit earáge láhkai, go uvssa sáhttá dušše gokčat. Ja dolahan gal cahkkeha. Biktasiid sáhttá baicce coggat badjelii.
Áigeguovdil geavahus sátnái lea bidjat boahkuid, vaikkoba mánnái. Nuppelágan geavahus sátnái fas lea bidjat miela vuollái. De sáhttá jurddašit, ahte maid dalle lea, leago dalle vurkeme millii vai maid?
Vuostá maid sáhttá bidjat, vaikko nuppit gal vuostálastet. Ja go rehkenastá, de bidjá vuos guokte ja de bidjá dasa vel vihtta.
Árgabeaigeavahusas sáhttá gullot “son dat gal bijai munnje vuoššan doarvve varas guliid.” Dalle dat mearkkaša, ahte dat nubbi lea addán dahje vuovdán daid guliid. Nuppi sáhttá leat oainnat vuos jearran ahte "bijatgo munnje veháš guoli"?
Naba galgábat gahpira bidjat oaivái vai hildui? Ja gean dagut leat bijagat? De bidjal Yle Areena ala ja guldal ođđaseamos Jovnna sátnegihpu.
Geahča bidjat-sáni geavaheamis maid: Konrad Nielsen - Lappisk ordbok Vol.1, A-F ja Pekka Sammallahti - Sámi-suoma sátnegirji.
Beaivvi ságaid ja Yle Ođđasiid Sámis sáhtát maid guldalit Yle Areenas.
