Ohcejogas leat vahkuloahpa áigge vuođđudan Suoma davimus researvalaččaid searvvi. Olbmot leat dál beroštuvvan leat mielde eanabealuštandoaimmain.
Hotel Utsjokii ledje lávvardaga eahketbeaivve čoahkkanan olbmot háleštit máilmmi dilis jo buriin áiggiin ovdal vuođđudančoahkkima álgima.
– Dál go geahččá mii máilmmis dáhpáhuvvá, de galhan dat lea fuolasmahttán olbmuid. Iešge álgen smiehttat, ahte ferte leat mii nu báikkiid, gos hárjehallat ja doalahit dáidduid, muitala Mateusz Moilanen, guhte lei okta sis gii lei ordnemin vuođđudančoahkkima.
Ohcejogasge olbmot leat fuolas Suoma dorvvolašvuođas
Vuođđudančoahkkimii ledje boahtán moaddelot olbmo. Ruošša falleheapmi Ukrainai guovvamánus lea boktán olbmuid maid Ohcejogas jurddašit eanabealuštanáššiid, vaikko Nato-riika leage joga nuppe bealde.
– Galhan dat lea dat Ukraina ášši buktán dánge ovdii, iihan dát várra muđui livčče vuolgán ovddidit dán ášši, árvala Aarne Sujala.
Maiddái Aslak Pieski lea hálidan vuolgit researvadoibmii mielde, go su mielas Suomas lea árvitmeahttun kránnjáriika. Son lea johtán dávjá soahtehárjehusain ja smiehtadan, ahte siviiladoaimmainge fertejit leat mielde olbmot, geain lea ipmárdus dakkár áššiin.
– Suomas lea das buorre, ahte leat olu researvajoavkkuin dakkárat, geat leat vázzán militearabálvalusa. Mis lea viiddes diehtu ja máhttu eanabealuštanáššiin, muitala Pieski.
Áigot gáibidit riikabeivviin ja bealuštanministtaris veahki báhčinbánii
Searvvi ulbmilin lea doalahit ja buoridit eanabealuštandoaimmaid Ohcejoga guovllus. Sii áigot ordnegoahtit ovdamearkan kurssaid báhčimis ja dádjadeamis duottarguovlluin. Mateusz Moilanen lea fuomášan go lea ieš johtán duoddaris, ahte sápmelaččain lea erenomáš vuohki dádjadit meahcis ja duoddaris.
Báhčinhárjehusaid ordnemis lea dál goittot váttisvuohtan dat, ahte Ohcejoga girkosiidda dahje Njuorggáma lahkosis ii leat báhčinbána. Gáregasnjárgga lahkosis lea báhčinbána, muhto dat lea Moilanen mielas menddo guhkkin Ohcejohnjámmi ja Njuorggán olbmuide.
– Mis ii leat dáppe bána, gos hárjehallat dorvvolaččat. Mii áigut gáibidit Suoma riikabeivviin ja bealuštanministtar Antti Kaikkonenis veahki báhčinbána oažžumii deike, loahpaha Moilanen.
Beaivvi ságaid ja Yle Ođđasiid Sámis sáhtát maid guldalit Yle Areenas.
