Badjeolbmo njoarostanmáhtu dihttui suohpansprinttas, vaikke buohkat eai gillenge nu duođas viehkat.
Dievdduid suohpansprintta vuoiti Niko Näkkäläjärvi ii dárbbašan hárjehallat gilvonjoarosteami.
– In leat gal daidda gilvvuide hárjehallan. Lean gal geahččalan, mo dát galgá. Vehá earálágan dát stoalpu leat njoarostit go boazu. Boazobargguinhan gálgá njoarostallat ain duollet dállet. Geassit njoarostallat misiid gitta, Näkkäläjärvi dadjá.
Badjeolbmuid mánát leat hárjánan njoarostallit
Badjenieiddaguovttos Nuppu-Maaria ja Elle-Matilda Näkkäläjärvi eaba gal ballan njoarosteamis ja liikuiga viehkatge.
Mánáguoktái lei gilvohallan somás vásáhus.
– Ahte go mun ožžon dán njoarosteamis ovtta čoarvvi ja dat ahte oaččui viehkat, Elle-Matilda muitala.
Nuppu-Maaria fas diđii gal dalánaga mii dán gilvvus lei erenomáš.
– No, dát njoarosteamit. Ja oaččui viehkat ja fertii mohkohallat.
Lunddolaš viiddidit valáštallamii
Ijahis ija váldolágiddeaddji lea valáštallansearvi Anára Sámisearvi. Danin leige lunddolaš viiddidit Ijahis ija valáštallama guvlui.
Suohpansprinttat mánáide, nuoraide ja ollesolbmuide bearjadaga sihke njoarostangilvu nissonolbmuide ja dievdduide lávvardaga geasuhedje logiid oassálastiid.
Anára Sámisearvvi ságadoalli Aslak Paltto háliida čalmmustahttit njoarostallama ja miiba buoremus dasa go dakkár dáhpáhus, gosa olbmot čoahkkanit.
– Nu ahte čalmmustahttit, loktet fas bajás dán valáštallama, man suohtas dat lea. Ii dat dárbbaš leat nu duođalaš, muhto galhan dat eske lei duođalaš...huh, Paltto mojohallá.
– Gal suohpangiehta birge juohke hommás. Gánneha hárjehallat suohpaniin njoarostit, ávžžuha Paltto.
Boahtte jagi fas
Lágideaddjit ledje duđavaččat valáštallangilvvuide ja dat leat prográmmas maid boahtte jagi, dadjá festiválabuvttadeaddji Oula Guttorm.
Festivála dáiddalaš jođiheaddji oaidná sámi valáštallangilvvuin viidásotgo mearkkašumi sámi kultuvrii.
– Sohkabuolvvat leat ovttas dán min festiválas. Dán jagi prográmmii lasihuvvon valáštallangilvvut čatne sámi ealáhusaid mielde festiválii. Ealáhusat leat goittotge dat, mat dollet min kultuvrra eallin, dadjá dáiddalaš jođiheaddji Anna Näkkäläjärvi-Länsman.
Geahča Facebook-video Ijahis ija njoarostanstiillain dáppe!
Tv-ášši beassá oaidnit maid Ođđasat-sáddagis Yle Fem -kanálas vuossárgga 22.8.2016 dbm 20.45!
