Tres segundos de memoria bastarían para recordarte

IV

Tres segundos de memoria bastarían para recordarte.

O corazón é un ourive
que trafica coas cadeas do desexo
e condensa as lembranzas
coma a esencia dos perfumes.

Esculpe matrioskhas,
pequeñas caixas de Pandora
para gardarte nelas
        e non abrirte nunca,
para soterrar o medo a que devores
os meus labirintos internos.

Ti
e a nosa historia toda
concentrada en tres segundos.

Celia Parra: No berce das mareas (2009)

Versións:

A banda da loba: Tres segundos*; Bailando as rúas; 2017; Pista 1



*[A versión musical do grupo A banda da loba, repite, a xeito de retrouso, os títulos dos tres capítulos nos que se divide a obra de Celia Parra, No berce das mareas: 1. A memoria…; 2. …é un preludio…; 3. …do esquecemento.]

Tan só me pregunto

X

Tan só me pregunto
que soaba no intre en que o tempo
estalou en cristais de néboa.

Celia Parra: No berce das mareas (2009)

Versións:

A banda da loba: Coma un blues*; Bailando as rúas; 2017; Pista 2



*[A versión musical de A banda da loba está composta por éste e máis polos poemas Lembro aquelas tardes e Chegades recendendo a canela; todos eles da obra de Celia Parra: No berce das mareas, do ano 2009.]

Chegades recendendo a canela

XI

Chegades recendendo a canela.
Os ollos, cristais de sal,
reflectían preguntas
            incendiarias.

Non soubeches respondelas.

Só un sabor acedo,
un lume que medraba por dentro
            e a derradeira bágoa
que estalou no chan
e secou a flor.

Celia Parra: No berce das mareas (2009)

Versións:

A banda da loba: Coma un blues*; Bailando as rúas; 2017; Pista 2



*[A versión musical de A banda da loba está composta por éste e máis polos poemas Lembro aquelas tardes e Tan só me pregunto; todos eles da obra de Celia Parra: No berce das mareas, do ano 2009.]

Lembro aquelas tardes

I

Lembro aquelas tardes
de outono
as follas mortas
rúas enchoupadas de swing
e o recendo
trala choiva.

Lembro as bucinas
sincopadas
a intermitencia das sereas
cortando o aire.
E nós, enfeitizados por un ritmo subterráneo
sen rumbo pola cidade insomne
construíndo memorias
enchéndonos de luces.

O teu recordo volve a min
sereno
coma un blues na noite.

Celia Parra: No berce das mareas (2009)

Versións:

A banda da loba: Coma un blues*; Bailando as rúas; 2017; Pista 2



*[A versión musical de A banda da loba está composta por éste e máis polos poemas Chegades recendendo a canela e Tan só me pregunto; todos eles da obra de Celia Parra: No berce das mareas, do ano 2009.]